Американката Лиза Мартин (59), мајка на четири деца, ја напушти болницата на новогодишната ноќ по 95 дена поминати на интензивното ковид одделение.
За тоа време, лекарите во Џорџија правеле натчовечки напори да ја спасат. Лиза била 40 дена во идуцирана кома и дури 59 дена на респиратор, а за време на престојот во болницата таа претрпела и тежок мозочен удар.
Иако нејзините шанси да преживее биле мали, се случило вистинско чудо, пишува „Бизнис Инсајдер“.
„Нејзиното неверојатно патување вклучува 59 дена на респиратор, 40 дена во индуцирана кома и преживеан мозочен удар на фронталниот лобус“, објавија од болницата.
Семејството, кое длабоко верувало дека Лиза сепак ќе преживее, решило да чека максимум 11 дена пред да даде конечен одговор. Одлуката била тешка и цело време се молеле Лиза да добие трошка сила да ја продолжи својата животна борба.
„Бог имал различни планови. Точно на 11-тиот ден, кога семејството требаше да нè извести за одлуката, Лиза се разбуди од кома и ја помрдна раката“, велат од болницата.
Оваа храбра жена потоа била испратена во две други болници за дополнителни третмани и рехабилитација. Нејзиното закрепнување вклучувало повторно да учи да оди, да зборува и да јаде.
„Морам да носам кислород 24 часа на ден и морам да пешачам со помагало или во инвалидска количка ако имам намера да поминам подолго растојание… Лекарите веруваат дека со текот на времето ќе се опоравам целосно“, вели Лиза.
Една од нејзините ќерки вели дека искушението низ кое поминувало нивното семејство ги сменило нивните животи на подобро.
„Дали ми беше тешко за мајка ми која се зарази со ковид-19 и се најде на работ на смртта и сега се бори да се врати во нормала? Апсолутно! Но, ако Бог преку мајка ми сакаше да покаже дека луѓето треба да бидат големи борци и никогаш да не се предаваат како што не се предаде таа, благодарна сум што ја избрал токму неа“, изјави ќерката на Лиза.
Преземено од Слободен Печат.
