Препорачаниот дневен внес на течности варира од личност до личност, во зависност од телесната тежина, возраста и физичката активност. Потребите за течности се зголемуваат во текот на летните месеци и за време на физичката активност, но имајте на ум дека дневниот внес на течности ја вклучува и течноста што ја внесуваме во организмот преку храната, а не само водата или другите пијалаци.
Вода, многу вода
Општа препорака е за секој килограм од вашата телесна тежина да внесувате 0,3 дл течност, па ако имате 60 килограми, препорачливо е да пиете 1,8 литри течност. Ако сте на активен одмор, тогаш за секој час активност треба да пиете околу половина литар течност.
Покрај водата, потребата за внес на течности може да се задоволи со цедени сокови од овошје и зеленчук, бистри супи, незасладени топли и ладни чаеви, газирани пијалаци без шеќер или млеко. Пијалаците кои содржат кофеин, теин и алкохол, како и засладените пијалаци, без оглед на
количината, треба да се избегнуваат.
Студените пијалаци го ладат само горниот дел од дигестивниот систем и брзо ја попримаат температурата на телото, па затоа не ја намалуваат температурата на целото тело. Пијалаците кои се на границата на замрзнување предизвикуваат повеќе штета отколку корист, бидејќи поради големите температурни разлики ги оштетуваат оние делови од телото со кои доаѓаат во допир и предизвикуваат долгорочно оштетување на површинското ткиво на дигестивниот тракт, со што создаваат простор за задржување на микроорганизмите и можност за развој на воспаление.
Подобар ефект имаат умерено разладените пијалаци, додека самото ладење на телото треба да се постигне со престој во разладени простории и со туширање.
Јадете многу овошје, зеленчук, цели зрна и печурки
Ова ќе ви обезбеди да внесете корисни хранливи материи, витамини, минерали, електролити, влакна и вода. Притоа не заборавајте на основните хигиенски навики како што се миењето на овошјето и зеленчукот, и секако, на рацете. Обезбедете ја вашата дневна петка – јадете овошје и зеленчук пет пати во текот на денот, овошје наутро и за ужина и зеленчук за ручек и вечера. Големината на еден оброк овошје или зеленчук треба да се вклопи во вашата дланка. Избирајте го овошјето што содржи повеќе вода како лубеницата, дињата и праските, а зрнестото овошје (малините, капините, боровинките) исто така придонесуваат за ладење на телото.
Не јадете овошје веднаш по оброкот, бидејќи тогаш, поради варењето на претходно внесената храна, овошјето ферментира и дава чувство на тежина и надуеност.
Користете маслиново масло
Кога консумирате маснотии во текот на летото, не е важно само колку туку и кој вид маснотии ги внесувате. Внесот на маснотии секако треба да се намали. Користете ладно цедено маслиново, кое содржи квалитетни масни киселини, а препорачливо е да го избегнувате пржење.
Искористете го летото за да уживате во рибата, сината риба содржи многу корисни состојки, вклучувајќи полинезаситени масни киселини, витамин Д и витамини Б. Обрнете внимание на свежината на рибата, особено на сината риба, бидејќи во текот на несоодветното чување од уловот до рибарницата, се создава алергенот хистамин па е можна алергиска реакција.
Изворите на протеини мора да бидат разновидни, не се вредни само протеините од животинско потекло, туку се препорачуваат и протеините од растително потекло. Со протеините не треба да се претерува, бидејќи за разложување на протеините мора да се потроши повеќе енергија отколку за разложување на мастите и јаглехидратите, што значи дека организмот повеќе се загрева. Оброците треба да се поделат на помали и да се јадат почесто, така што нивото на шеќерот во крвта да биде изедначено.
Солта е исто така важна за нормално функционирање на човечкиот организам. Меѓутоа, треба да се внимава при солењето на храната, бидејќи повеќето од намирниците што ги консумираме се богати со сол, па затоа добиваме доволно сол за да ги задоволиме дневните потреби на организмот. Се препорачува да се користат зачински билки наместо сол во подготовката на храната.
Избегнете го труењето со храна
Во случај на консумирање здравствено неисправна, бактериолошки загадена храна, човек може да заболи од цревни инфекции и да добие симптоми како гадење, дијареја (пролив), повраќање и зголемена телесна температура. Дијарејата може да биде опасна бидејќи поради зголемениот губиток на течности и електролити може да доведе до дехидратација, што може да се манифестира со слабост и вртоглавица. Затоа е важно да ги надоместите изгубените течности и електролити и да пиете што повеќе вода, незасладени чаеви и бистри супи. За да избегнете труење со храна, важно е правилно да ја подготвувате и складирате храната.
