Пејачката Лепа Брена неодамна откри кој легендарен актер ја научил како да се „ресетира“ за петнаесет минути. Таа и Никола Симиќ во далечната 1987 година заедно го снимале култниот филм „Хајде да се волимо“, и Брена тогаш се чудела како актерот успева да биде секогаш свеж и расположен и покрај целодневното снимање.
Потоа тој ја вовел во светот на медитацијата.
– Научив како да се одморам за петнаесет минути. Ми треба апсолутен мир, тишина, ги затворам очите, како да медитирам. Сè околу мене е исклучено. Не треба да има никакво електромагнетно зрачење, бидејќи сето тоа влијае на нас. Се изолирам. Го исклучувам мозокот. Лежам и не размислувам. Ги отфрлам сите мисли. Првиот човек што ме воведе во медитацијата беше покојниот Никола Симиќ кога го снимавме филмот „ Хајде да се волимо“.
– Додека сите излегуваа да пушат и да пијат на паузите, Никола Симиќ седеше во јога поза и молчеше. Кога сѐ ќе завршеше, тој си заминуваше спокоен. Го прашав: „Никола, што правевте?“. Тој ми рече „Јас медитирам“. Се прашував, што е тоа медитација? Тоа беше во 1987 година, тогаш мислев дека тоа е за високата класа, дека не е за обичните луѓе. Го прашав што и како се прави и тој ми објасни – вели Брена.
Режисерот на споменатиот филм, Миќа Милошевиќ, еднаш откри дека пејачката непланирано ја добила улогата во неговото остварување.
– Тогашниот менаџер на Брена, Рака Ѓокиќ, предложи да ја вклучиме во филмот. Се согласив и во сценариото ги додадов кратката нумера и сцената со Брена во кафаната. Меѓутоа, кога таа застана пред камерата, почувствував дека е извонредна личност, па ја проширив нејзината улога од епизодна во главна. Одлично се снајде – истакна во една прилика режисерот и додаде:
– Сето тоа чинеше милијарда и пол тогашни динари. Кога се прошири веста дека во филмот ќе игра и Брена, во проектот се вклучи и продуцентската куќа „Унион филм“ со свој финансиски удел. Во филмот се вклучени и автентични сцени од концертите на Брена.
