– Како што најавивме од утре до вторник времето во Македонија ќе биде облачно и ЗНАЧИТЕЛНО ПОСТУДЕНО со повремени врнежи од дожд и снег на повисоките места и на планините. На повисоките места и на планините ќе дојде до формирање на нова снежна покривка а сето ова ќе биде проследено и со засилен ветер од северен правец. За време на овој студен бран, услови за врнежи од дожд и снег ќе има и на некои места со помала надморска височина. Локално врнежите ќе бидат ПОИНТЕНЗИВНИ и ќе наврнат над 30 л/м2 воден талог – вели нашиот метео прознозер Славчо Попоски.
Според Попоски постабилно време ќе имаме од вторник. Што се однесува до температурите, тие од утре ќе опаднат дури за повеќе од десет степени во споредба со сегашните и максималните дневни ќе се искачуваат во интервалот од 3 до 11 степени, додека наутро истите понекаде ќе се спуштаат под нулата со што на некои места, и тоа особено на повисоките и планинските места ќе има појава на мраз.
И во Скопскиот регион од утре до вторник ќе има повремени врнежи од дожд, додека на околните планини ќе има услови за врнежи од снег. Ќе дува умерен до засилен ветер од северен правец, додека максималните температури ќе се искачуваат во интервалот од 10 до 13 степени, додека наутро истите ќе се спуштаат во интервалот помеѓу 0 и 4 степени.
Исто така да напоменеме дека овие температури кои се очекуваат од утре ќе бидат ЗНАЧИТЕЛНО ПОД ПРОСЕКОТ за овој период од годината.
