Хрватската пејачка Северина Вучковиќ се огласи откако синоќа, на 25 август, беше задржана на границата меѓу Хрватска и Србија при обид да влезе во Србија.
Северина денеска, 26 август, издаде соопштение со желба да се слушне и нејзиното видување на настанот во кој го опиша разговорот со цариниците и припадниците на МУП на граничниот премин „Бајаково“.
Како што тврди хрватската пејачка, таа со својот менаџер отишла на забава по повод еден 18. роденден на кој требало да настапи, но била спречена.
– Граничниот полицаец, при прегледувањето на документите, нè замоли да застанеме настрана, каде што бевме оставени неколку часа во автомобилот. Потоа отидов до зградата на граничната полиција барајќи тоалет, а во меѓувреме ми рекоа дека „се чекаат инспектори од Министерството за внатрешни работи кои патуваат од Белград“. Сфатив дека станува „сериозно“ – рекла пејачката.
Северина потоа наведува дека полицајците ја испрашувале за нејзините претходни изјави и ставови за Сребреница, за неодамнешните објави на Инстаграм во врска со протестите против ископувањето литиум, како и за Олуја. Таа нагласила дека тогаш го прекинала разговорот.
– Кога почнаа да ме испрашуваат за тоа што мислам за силуваните жени и за тоа дека Србите се протерани од Хрватска – јас реков дека секоја жртва е тешка, но дека ја прекинувам оваа претстава и дека повеќе нема да одговарам на нивните прашања. да ми ги вратат документите, затоа што нема да вежбаат сила врз мене, бидејќи не сум личност погодна за заплашување и дека утре за сето ова ќе читаат во сите медиуми – вели Северина, додавајќи дека на полицаецот му рекла „на претпоставените да им порача дека испаднале глупави, бидејќи со тоа само ќе постигнат контраефект“, како и дека не живее од Србија.
– Го прашав и кој го наредил ова, тој се обиде да ме увери дека ова е вообичаена редовна контрола. Редовна, велите… Вакво нешто никогаш не ми се случило – ниту во Америка, ниту во Канада, ниту во Швајцарија, а особено во земјите од регионот, бидејќи сите ме сметаат за своја – рекла Северина.
Пејачката додала и дека цариниците и припадниците на МУП „детално го претресувале нејзиното возило и работите во него цели 45 минути, како на последни ситни шверцери“ и дека „ја сака Србија, дека ѝ посакува што побрзо да стане демократска и дека никогаш повеќе нема да дојде додека овој, сите знаеме кој, не се повлече од власт“.
– Неколкупати се обидов да им објаснам дека секој има право на свое мислење, дека вербалниот деликт е укинат со укинувањето на комунизмот. И дека ги жалам сите нив, дека ги сакам, дека Србите се чесен и добар народ, но дека нивната влада е грозна и дека никогаш не сум рекла дека Србите биле геноцидни, туку дека медиумите измислуваат лаги, како што измислуваат лаги со години за сите што се спротивставуваат на режимот.
