Раде Шербеџија и неговата сопруга режисерката Ленка Удовички, од неделата се наоѓаат во самоизолација. Познатиот глумец откри како ги поминува деновите.
„Ме радува што нашите здравствени иституции се поставија толку стручно, што е доказ дека сме поставиле некои стандарди во здравството. До мене стигнуваат приказни за пожртвуваноста и стручноста на сестрите и на докторите по болниците, нивната професија е нешто што би морало да се цени, да се наградува и во мирни околности“, изрази благодарност Шербеџија.
„Со оглед на тоа што неодамна патував, кога се вратив дома во неделата, веднаш отидов во самоизолација, како и мојата Ленка. Не поради страв дека ќе се заразиме, туку да го намалиме ризикот од пренесување на заразата и да бидеме дел од општата, превентивна приказна“, порача глумецот.
На прашањето како тој и Ленка ги исполнуваат деновите, рекол:
„Работиме на Крлежа, зашто посакав да ја проширам мојата монодрама „Мојата пресметка со него“ и да ја изведам на Бриони ова лето. Се подготвував за сезоната со „Улис“, пак ќе ја поставиме „Кој се плаши од Вирџинија Вулф“, „Кралот Лир“, „Антигона“, а подготвуваме и една претстава на Ленка во копродукција со Белградскиот драмски театар“, раскажал Раде за српските медиуми.
