Златко Настов 15 години бил готвач во Охрид, а сега, веќе четири години е преселен во родниот град Кавадарци и оттогаш – вели – му се остварил сонот да си го средува дворот од сто квадратни метри.
Одговорноста за уредувањето на дворот е само негова, сè направил со свои раце.
Во дворот на Златко доминираат зимзелени дрва.
– Сè уште се мали, но ги негувам како свои деца – ни открива Златко.
Но, тука се и прекрасните темјанушки, петунии, малини и други растенија. Час до два во денот Златко им посветува време и внимание на овие убавици.
– Доволно да си ја наполниш душата со позитивна енергија и да им дариш љубов и нега на растенијата во дворот – вели Златко.
Најомилени му се розите, „мирисот и убавината ме релаксираат“ – ни открива.
На крајот следува совет од Златко за сите оние кои сакаат да почнат да се занимаваат со одгледување цвеќе.
– Дајте им малку љубов и време на цвеќињата, тие ќе ви возвратат сто пати повеќе. Колку повеќе вложувате во нив, толку ќе ве „навлечат“ и ќе станете зависник од нив.
Инаку, Златко е член на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Ви ја носиме атмосферата од преубавиот двор преку фотогалерија.
Фото -приватна архива
