Украина не ги одбива преговорите со Руската Федерација, за тоа Москва мора да исполни еден услов.
Кабинетот на претседателот соопшти дека Украина никогаш не ги одбила преговорите со Руската Федерација и го наведе условот.
„Мора да се разбере: Украина никогаш не ги одби преговорите. Нашата преговарачка позиција е позната и отворена“, напиша на Твитер Михаило Подољак, советник на шефот на Кабинетот на претседателот на Украина.
Според Подољак условoт е повлекување на руските војници од територијата на Украина.
„И потоа – сè друго“, – додаде советникот на шефот на државата.
Според него, рускиот претседател Владимир Путин не е подготвен за ова.
„Затоа, ние сме конструктивни во нашата проценка: ќе разговараме со следниот лидер на Руската Федерација“, појасни Подољак, пренесува украинската новинска агенција униан.
Преговори меѓу Украина и Русија
Инаку, претседателот на Украина, Володимир Зеленски, изјави дека Украина нема да преговара со Путин: „Ние сме подготвени за дијалог со Русија но со друг руски претседател“.
Според него, Украина е подготвена за дијалог со Русија, но со друг претседател на Руската Федерација. Претседателот на Украина истакна дека Путин „не знае што е достоинство и чесност“.
Зеленски ја даде соодветната изјава – пренесува Униан – по уште еден обид на Руската Федерација да анектира нови украински територии.
