Киев се за неутралност доколку има гаранции. Москва пак, го намалува притисокот врз Киев и не се противи Украина да влезе во ЕУ. Ова се позициите на крајот од преговорите во Истанбул.
Еден ден, а не два, како што беше првично планирано, за преговорите меѓу Русија и Украина во Истанбул. Тричасовни разговори кои руската страна ги опиша како „конструктивни“ и кои би ги поставиле темелите за средба лице в лице меѓу двајцата претседатели Владимир Путин и Володимир Зеленски, според украинската делегација.
Додека се чека Кремљ да ги испита и да одговори на украинските предлози за безбедносни гаранции што треба да му се дадат на Киев во замена за неговата неутралност, Русија рече дека „драстично ќе ги намали“ маневрите околу украинската престолнина и Чернихив, сега уништени од бомбардирањето. А, според американски извори, веќе е во тек повлекување на силите во предградието на Киев, што изгледа дека е врамено во „промена на стратегијата“.
„Сè уште не е прекинат огнот“, вели рускиот главен преговарач Владимир Медински, но „тоа е она кон што се стремиме“. Пред да се постигне заеднички договор меѓу страните, објаснува тој, „има уште долг пат да се помине“, но целта е „постепено да се постигне ублажување на конфликтот барем на фронтовите“ на Киев и Чернихив.
„Денес е постигнат најзначаен напредок во преговорите“, изјави турскиот министер за надворешни работи Мевлут Чавушоглу на крајот од разговорите, додавајќи дека во иднина се очекува нова средба меѓу министрите за надворешни работи на Украина и Русија, без да се прецизира датум. . Чавушоглу по денешната средба зборуваше за „помирување“ меѓу страните. „Ќе продолжиме со нашите напори за постигнување прекин на огнот и постојан мир“, рече турскиот министер.
Русија вели дека добила писмени предлози од Киев кои ќе гарантираат нејзина неутралност и денуклеаризација. Додека Украина објаснува дека нема да влезе во НАТО, но нејзината кандидатура за влез во Европската унија не може да биде блокирана. Ова го соопшти украинската делегација. Рускиот главен преговарач Медински рече дека Русија не е против пристапот на Украина во ЕУ. „Руската Федерација од своја страна не се противи на желбата на Украина да се приклучи на Европската унија“, рече Медински, а пренесува Риа Новости.
Шефот на украинската делегација Арахамија рече дека „земјите-гаранти ќе мора да ни обезбедат вооружени сили, оружје и затворено небо“. Меѓу гарантите што ги посочи Украина за нејзината безбедност, Арахамија ги наведе Италија, Обединетото Кралство, Кина, Полска, САД, Франција, Турција, Германија, Канада и Израел. Но, „понудите на Украина за безбедносни гаранции не се однесуваат на територијата на Крим и Донбас“, прецизираше шефот на руските преговарачи, известува раињуз.
РОМАН АБРАМОВИЧ е „одобрен од двете страни“: Во која функција е дел од преговорите во Турција?
