Српско-американскиот актер Воислав Говедарица, кој важи за еден од најуспешните Срби во Холивуд, ненадејно почина на 83-годишна возраст, јавуваат медиумите.
Тој беше познат и по имињата Воја Гориц и Воја Крстарица, а починал во Лос Анџелес во САД.
Освен што беше актер, Говедарица беше и успешен каскадер, но и телохранител на холивудскиот актер Силвестер Сталоне.
Сталоне дури се ангажирал за Воислав да добие улога во познатиот серијал „Рамбо“ (Rambo), а тој се појави во вториот дел од филмот. Во филмот, сите го знаат како Русинот што го мачеше Рамбо.
Исто така, тој е многу познат по тоа што го играше негативецот во некогаш многу популарниот филм со Жан Клод Ван Дам – „Лавовско срце“ (Lionheart).
Во тој американски филм, Воислав во еден момент изговара една позната реченица на српски јазик која во тие години многу се цитираше во Србија.
Исто така, Говедарица се појави како гостувачка ѕвезда во четвртата сезона од популарната српска серија „Убијците на мојот татко“.
Говедарица е роден во 1940 година, а во светот на филмот првпат го вовел познатиот Пуриша Ѓорѓевиќ.
