Босанскиот пејач Един Дервишалидовиќ, попознат како Дино Мерлин, има закажано четири концерти во главниот град на Србија. Додека дел со нетрпение го чека концертот на Мерлин, се повеќе луѓе потпишуваат петиција и не сакаат Дервишалидовиќ да одржува концерти во Србија поради неговиот наводен говор на омраза кон Србите.
Имено, на 27 јули беше покрената петиција на веб-страница каде има фотографија од босанскиот пејач со натпис „Непосакуван“, како и сите негови изјави кои наводно ги дал против српскиот народ. За само еден ден потпишана е петиција од над 10.000 луѓе против влезот на Мерлин во Србија. Оваа бројка расте секој момент, а досега петицијата ја потпишале над 50 илјади луѓе кои на овој начин се изјасниле дека не сакаат концерт(и) на Мерлин во Белград.
Инаку, Мерлин има закажано концерти за 18, 19, 21 и 22 ноември во Белград, од кои три се распродадени, а четвртиот се очекува да биде пополнет во рекордно време.
Само закупот на арената Старк чини 25.000 евра, пренесува српски Телеграф, што значи дека Мерлин има фиксен трошок само за тоа од 100.000 евра. Бројките се однесуваат на 4 концерти, бидејќи евентуалниот петти или шести се уште не е официјално закажан. Се проценува дека Мерлин ќе си замине од Белград со заработка од 3 милиони евра.
