Разговараме со две дами, Славица Панова и нејзината мајка, пензионерка, Павлина Волчева. И двете – големи љубителки на цвеќиња.
– Мајка ми е пензионерка, со одгледување на цвеќиња се занимава многу одамна, дури и продаваше на нашиот пазар – ни раскажува Славица.
Павлина е самата одговорна за уредување на дворот кој се простира на околу 200-300 квадратни метри, а се наоѓа во населбата Глишиќ во близина на Кавадарци.
– Секој слободен миг го користи за реализирање на своите идеи – продолжува Славица.
Во дворот доминираат цвеќиња што не мрзнат зимно време, но има и салонски цвеќиња, а има посадено и бавча со зеленчук.
– Мајка ми е максимално посветена на градината и бавчата, секој миг го вложува таму и тоа го прави со голема љубов – додава нашата соговорничка.
Павлина ни објаснува дека за сонце се погодни цвеќиња што не мрзнат, а за под сенка одгледува салонски цвеќиња. Нејзин најголем предизвик е да има некои ретки видови на цвеќе, а нема што нема!
Што се однесува до овошките, тука се кивито, смоквите, црешите, вишни, грозје, калинки, јаготки, сливи, малини, кајсија и јапонски јаболка, а од зеленчук има домати, пиперки, праз, лук, кромид, марула…Тука се и зачинските билки – рузмарин, нане, рен и други.
А еве го советот од Павлина за оние кои сакаат да почнат да се занимаваат со одгледување цвеќе.
– Идните цвеќари нека почнат прво со билки, зачин и цвеќиња што не мрзнат – советува таа.
Вредната пензионерка овошјето и зеленчукот од својата бавча ги користи за готвење на вкусни јадења и приготвување на зимница.
Браво за Павлина.
Инаку, Славица (ќерката на Павлина) е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата од прекрасниот двор и бавча на Павлина.
Фото – приватна архива
