Љупчо и Весна Блажески се земјоделско семејство, а цвеќиња одгледуваат отстекогаш со голема љубов, секоја година – како што велат – сè повеќе и повеќе.
Живеат во крушевското село Свето Митрани, нивниот двор се протега на околу тристотини квадратни метри.
– За уредување на дворот и цветната градина се грижиме јас и мојата снаа Татјана. Заедно го средуваме и правиме да биде место кадешто моите внучиња си играат, а ниу уживаме во слободното време после напорната работа, ни раскажува Весна.
Дворот изобилува со најразлични видови цвеќе.
– Сесонските ги сееме од рана пролет, а потоа ги рассадуваме, додека пак повеќегодишните цвеќиња внимателно ги чуваме во зимскиот период, ги негуваме и ги размножуваме во пролет – објаснува Весна.
Ова е царство на боите – сардели во различни нијанси, петунии, копривки, џунџулиња, три јатрви, кали, кактуси, бегонии, помпаси, и многу други видови, а најмногу ги има трендафилите, розите, околу сто корени, во разни бои.
Има и домашни цвеќиња, меѓу кои и орхидеи, дрво на животот, палма, драцена, адам, бамбус…
Во градината пак, покрај бројните цвеќиња има и многубројни овошни дрвја – јаболка, круши, вишни, сливи, лешници, дуња, кајсија, па се до арноја, малини и јаготки. Која убавина!
Весна ни раскажува дека секојдневните обврски со дворот одземаат најмалку по еден час, а одвреме навреме потребно е повеќе време за прихрана и косење трева.
– За сонце најиздрживи се сарделите, трендафилите, џинџулињата, а сите други се понежни и бараат шарена сенка – вели Весна. Додава дека за нив најголем предизвик е тоа што, после целата посветеност, вредна е секоја глетка и чувство на задоволство.
Совет од Весна за сите оние што би сакале да започнат да се бават со одгледување цвеќе – „ Мислам дека најважно е да се има љубов за цвеќето, а доколку некој сака да започне со одгледување, би советувала да започне со цвеќиња кои се поиздржливи на надворешните влијанија заради стекнување на искуство за понатамошно одгледување и на понежни видови цвеќе – советува таа.
Инаку, Весна е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата.
Но не само во пролетниот и летниот период, во овој двор сите годишни времиња имаат своја бајка.
Погледнете колку се убави и есента и зимата.
Фото – приватна архива
