Основачот и креативен директор на „Гранд“, Саша Поповиќ, почина на почетокот на овој месец, по битката со тешката болест, а неговото заминување погоди многумина.
Снимањето на српското музичко натпреварување „Ѕвездите на Гранд“, чиј креатор беше Саша, продолжи и по паузата. Како што откри водителот Милан Митровиќ, во негова чест ќе биде отпеана и една песна.
Се шпекулира дека станува збор за песната „Rode će se opet vratiti“, која беше последната песна која ја компонираше Поповиќ, а која ја отпеа „Гранд квартет“ – Немања Стевановиќ, Милан Динчиќ, Милан Станковиќ и Душан Свилар.
Милан Динчиќ – Динча објави фотографија од студиото на „Гранд“ на Кошутњак, на која е во друштво на колегите Немања и Душан.
– 18 години подоцна. Пред точно 18 години ја снимивме песната којашто ја компонираше Саша Поповиќ, „Rode će se opet vratiti“. Се чини дека дури сега добива целосно значење, кога некој наш драг привремено ќе го напушти овој живот – навел Динчиќ и додал:
– Убаво е да се видат драги колеги после долго време. Се потсетивме на убавите моменти од нашите почетоци. Гледајте нè наскоро на „Гранд“ во „Ѕвездите на Гранд“.
Она што некои го забележаа е дека на фотографијата го нема Милан Станковиќ, кој беше со нив во генерацијата и го сочинуваше четвртиот дел од квартетот.
Познато е дека Милан Станковиќ целосно се повлече од музичката сцена, а одамна ја напушти „Гранд“ продукција.
