На црвениот тепих на Филмскиот фестивал во Сараево вчера прошета и босанската актерка Јасна Орнела Бери, позната и како Јасна Бери.
Нејзиното доаѓање привлече внимание и поради приказната која со децении беше речиси непозната за јавноста, 72-годишната актерка била првата љубов на легендарниот пејач Здравко Чолиќ.
View this post on Instagram
Нивната романса започнала на почетокот на 1970-тите во Сараево, кога се запознале во Домот на млади на Скендерија, тогаш важно собиралиште на музичарите, актерите и другите уметници. Јасна јавно проговори за врската со Чолиќ дури многу години подоцна.
– Се запознавме многу млади, одамна. Се дружевме и тука првпат се вљубив. Сите имаме свои први љубови и тој секогаш ќе има еден дел во моето срце кој е резервиран само за него – раскажала таа во едно интервју.
Нивната врска не траела долго, а Јасна подоцна објаснила дека ѝ било тешко да се справи со големиот интерес на обожавателките за тогаш младиот и сè попопуларен пејач.
– Јас бев свесна дека само ќе страдам во таа врска. Не можев да го поднесам тоа и реков дека е подобро секој да го живее својот живот. Тие буквално му седат во скутот, а јас не можев да го гледам тоа – признала таа.
Здравко Чолиќ години подоцна накратко ја коментираше нивната приказна со зборовите: „Можеби прерано се сретнавме“.
И покрај раскинувањето, тие останале поврзани. Актерката рекла дека нивната прва средба по војната во Белград била особено емотивна, а нивната младешка љубов со текот на времето се претворила во долгогодишно пријателство.
– Чола ми ја посвети песната „Ноќ ми те дугује“ (Noć mi te duguje). Здравко Чолиќ е личност која шири позитивна енергија. Го сакав тој негов нерв, таа искра во окото. Тоа и понатаму е љубов што не можеш да ја помилуваш. Здравко секогаш ќе остане сечиј и ничиј – рекла актерката.
Порано оваа година, Јасна Орнела Бери била и на концертот на Чолиќ во Сараево. Кога ја здогледал во публиката, пејачот се симнал од сцената и топло ја прегрнал.
