Ерика Викман, финската претставничка на Евровизија, во интервју откри за притисокот на организаторите врз неа да ја цензурира нејзината изведба на песната „Ich komme“.
Една од главните фаворитки за овогодинашното издание на Евровизија, предизвика бурни реакции на интернет откако ја обвини Европската радиодифузна унија (ЕБУ) за цензура.
Имено, 32-годишната пејачка, која ќе ја претставува нордиската земја со песната „Ich komme“ која ја слави женската сексуалност, изјави дека ЕБУ побарала од неа да ја ублажи целата сексуална природа на нејзиниот настап, со кој извојувала убедлива победа на „Изборот на песна за Евровизија во Финска“ (Uuden Musiikin Kilpailu).
„Не е само една работа. Сакаат да ги сменам костимот, содржината на песната и кореографијата бидејќи мислат дека сето тоа е премногу сексуално. Сакаат да си го покријам задникот“, изјавила Викман во интервју за „Експресен“.
„Морам да играм според нивните правила и да се пресоблечам. Но, сето ова е малку двосмислено – тие мислат дека проблемот со мојот настап е што е премногу, но целата поента е да се биде премногу“, додала та.
Шефот и одговорното лице на финската делегација, Анси Аутио, изјави дека ЕБУ не барала промени, но дека имало дискусии и дека нема директни наредби за неопходни промени.
Сепак, Викман дополнително ги појасни своите изјави на Инстаграм, откривајќи дека ЕБУ навистина барала промени, особено во костимите и изведбите. Таа рече и дека на почетокот на неделата испратиле скици од новиот костим, но сè уште не добиле одговор.
Обожавателите на Евровизија застанаа на страната на пејчаката, обвинувајќи ја ЕБУ за лицемерие бидејќи во последните две изданија некои изведувачи носеа костими кои беа пооткривачки од оние на Викман.
