Роман Абрамович се однесува како „миротворец“ во руската војна во Украина. Сопственикот на Челзи, наводно, патувал меѓу Истанбул, Москва и Киев за да ги пренесе пораките меѓу Владимир Путин и Володимир Зеленски. Но, кога ја предал рачно напишаната белешка на украинскиот претседател во која се наведени условите за мир, рускиот претседател ќе експлодирал од бес.
Абрамович се обидел да ја спаси својата репутација откако беше погоден од санкциите на Велика Британија и ЕУ поради неговата близина со Путин. Неговите финасиски средства беа замрзнати во Британија и тој морал да ги стави на продажба своите имоти во Лондон и фудбалскиот клуб Челзи. Успеал да ги спаси своите јахти и млазни авиони, вредни стотици милиони фунти, избегнувајќи ги санкциите преку вода и воздушен простор. Токму поради неговата улога во преговорите, Зеленски побара од претседателот Џо Бајден да го суспендира усвојувањето мерки против олигархот.
Абрамович во средата го напуштил аеродромот Ататурк во Истанбул со приватен авион „Hawker 800XP“, преминувајќи преку Црното Море до Сочи. Неговиот локатор на летот се затемнил во близина на градот Минералније Води, а авионот потоа полетал од аеродромот Внуково во Москва и се вратил во турската престолнина.
Олигархот слетал во Москва за да се сретне со Путин и му предал рачно напишана белешка од Зеленски во која се наведени барањата на Украина за да потпише мировен договор. Според „Тајмс“, рускиот претседател му рекол на олигархот: „Кажи му дека ќе ги победам“.
Потоа се вратил во Истанбул и му се придружил на украинскиот политичар Рустем Умеров, за кој се вели дека дејствува како преговарач во Киев. Тие се сретнале во хотел со пет ѕвезди во турската престолнина, на состанок организиран од Ибрахим Калин, портпарол на претседателот Реџеп Таип Ердоган. Разговорите лице в лице ќе продолжат и оваа недела.
Калин за весникот „Хуриет“ минатиот викенд изјави дека „договорот е блиску“ за клучните прашања како НАТО, демилитаризацијата и заштитениот статус на рускиот јазик. Но, сè уште има разлики околу иднината на Крим и Донбас, кој беше окупиран за време на сегашниот конфликт.
Калин ја изнел идејата Крим и Донбас да ги задржи Москва на „долгорочен закуп“ како што тоа го правеше Британија со Хонг Конг помеѓу 1898 и 1997 година.
Се верува дека Путин ја разгледувал идејата, но се вели дека неговиот бес поради неуспесите на неговата војска и омразата кон Зеленски го спречуваат да попушти.
Абрамович и Умеров го посетиле украинскиот претседател во Киев, патувајќи со приватни авиони за Варшава, Полска. Турција не го санкционираше Абрамович и изгледа дека му помага во преговорите околу војната. Упатените велат дека Абрамович бил решен да помогне да заврши војната што поскоро, откако ги видел ужасите во Украина, каде што е родена неговата мајка Ирина. Во меѓувреме, во Турција се одржува уште една рунда преговори меѓу министрите за надворешни работи на Русија и Украина.
ПРВО ИНТЕРВУ на ЗЕЛЕНСКИ за руските медиуми: „Внимателно ќе го разгледаме прашањето за неутралност“
