Актерката Џејн Фонда откри дека и е дијагностициран рак и дека оди на хемотерапија.
Во објава на Инстаграм, каде што има 1,9 милиони следбеници, 84-годишната Фонда откри дека боледува од не-Хочкинов лимфом. Фонда го опиша како „многу излечив рак“ и рече дека се чувствува многу среќна поради тоа.
Холивудската икона ја искористи својата објава за да ја истакне состојбата на здравствената заштита во САД и рече дека ќе продолжи со својот климатски активизам. Таа напиша дека се чувствува среќна бидејќи има здравствено осигурување и пристап до најдобрите лекари и третмани.
– Разбирам и болно е дека сум привилегирана во ова. Речиси секое семејство во Америка мораше да се справи со ракот во еден или друг момент, а премногу од нив немаат пристап до квалитетната здравствена заштита што ја добивам, и тоа не е во ред“, рече таа.
Не-Хочкиновиот лимфом е ретка форма на рак кој се развива во лимфниот систем. Фонда напиша дека ќе помине шест месеци хемотерапија, но дека „нема да дозволи ништо од ова да му пречи на мојот климатски активизам“.
– Ракот е учител и внимавам на лекциите што ми ги носи. Едно нешто што веќе го сфатив е важноста на заедницата и продлабочувањето на сопствената заедница за да не бидеме сами. А ракот, со мојата возраст – скоро 85 години – дефинитивно учи на важноста да се приспособиме на новите реалности, рече таа.
