Популарноста на сериите и документарните филмови за вистински злосторства продолжува со несмалено темпо, а најнов пример за овој тренд е серијата за еден од најозлогласените убијци во американската историја, Џефри Дамер.
Серијата на Нетфликс „Дамер-чудовиште: Приказната за Џефри Дамер“, стана најгледаната серија во првата недела од објавувањето од сите досегашни содржини на таа платформа, вклучително и „Squid Game“.
За само пет дена, претплатниците потрошиле неверојатни 196,2 милиони часа следејќи ја застрашувачката приказна за убиецот, канибал и некрофил од гледна точка на неговите жртви и сведоци, а за споредба, „Fate: The Winx Saga“, која е на второто место по гледаност, имала само 60,97 милиони часови гледаност.
Кој бил Џефри Дамер?
Џефри Дамер бил вистински човек, но работите што ги правел биле толку ужасни што изгледаат речиси невозможни.
Роден е во Милвоки во 1960 година и покажал проблематично однесување уште во детството, интересирајќи се за секцирање мртви животни.
Цели 13 години, почнувајќи од 1978 година, тој убил и распарчил седумнаесет мажи и момчиња, практикувал некрофилија и канибализам и конзервирал делови од телото и коските.
Конечно бил фатен во 1991 година и осуден на седумнаесет доживотни затворски казни, но веќе во третата година од отслужувањето на казната бил претепан до смрт од еден од затворениците.
Во десетте епизоди од новата серија се испреплетени сцени од наводно несреќното детство на Дамер, убиствата што ги извршил и неговото апсење.
Покрај незамисливите злосторства, серијата ја прикажува и неспособноста на полицијата на Милвоки соодветно да се справи со овој случај, бидејќи никој од нив не сакал да ги слуша соседите на убиецот, кои ги предупредувале дека нешто чудно се случува во станот на Дамер.
Што е уште пострашно, двајца полицајци ја вратиле едната негова жртва право во рацете на Дамер, откако момчето тешко дрогирано и повредено се обидело да побегне.
Еван Питерс како серискиот убиец
Режисерот на серијата, Рајан Марфи, познат по серијата „Американска хорор приказна“, за главна улога го избра Еван Питерс, кој неодамна го играше Квиксилвер во филмовите за хероите на Марвел.
Бабата на Дамер, Кетрин, која му понудила на убиецот да живее со неа, не знаејќи за неговите страшни постапки, ја игра Мајкл Лернд, која била популарна телевизиска актерка во седумдесеттите и осумдесеттите години.
Ричард Џенкинс го игра таткото на Дамер, Лајонел, а Ниси Неш ја игра Гленда Кливленд, една од соседите која се обидува да го привлече вниманието на полицијата на страшните мириси и звуци кои се ширеле од станот на убиецот.
Бурни реакции
Серијата е вознемирувачка и полна со насилство, но и покрај тоа, доби солидна оценка од претплатниците на Нетфликс. Од друга страна, наиде на критики од роднините на жртвите на Дамер и сите оние кои веруваат дека прикажувањето на таква содржина е нечувствително за вистинските луѓе инволвирани во овој случај.
#DahmerNetflix is out, let’s not romanticize Jeffrey Dahmer just because he is played by Evan Peters.
Remember the victims.
A tread about each victim and who they were. pic.twitter.com/3NAZpG40Dq— hot girl jo (@sicssorluv) September 21, 2022
Рита Исбел, сестрата на Ерол Линдзи, една од жртвите на Дамер, чија изјава за медиумите по пресудата на серискиот убиец во 1992 година била реконструирана во серијата, тврди дека никој од Нетфликс не ја контактирал.
„Мислам дека Нетфликс требаше да ме праша дали ќе ми пречи или како се чувствуваме поради тоа што го прават. Ништо не ме прашаа. Само ја снимија серијата“, изјави таа за Инсајдер.
Многу корисници на социјалните мрежи истакнаа дека јавноста треба да се сеќава на жртвите, а не на човекот чие „име двапати се споменува во насловот на серијата“.
Во еден твит, еден корисник сподели листа од сите млади луѓе што Дамер ги убил, заедно со фотографии од жртвите.
