Врз основа на првите излезни анкети, Емануел Макрон има јасна предност со 58,2 отсто во вториот круг од претседателските избори во Франција, наспроти 41,8 отсто што и се припишуваат на ривалката Марин Ле Пен.
Според тоа, претседателот во заминување се движи кон потврда на победата.
Во првиот круг на 10 април, Макрон имаше 27,85%, наспроти 23,15% за Ле Пен. Трет беше кандидатот на радикалната левица Жан Лук Меланшон со 21,95 отсто, пред Ерик Земур со 7,07 отсто.
Бис на Макрон
Исходот од претседателските избори во 2017 година се повторува, кога Макрон победи со 66,10% наспроти 33,90% од Ле Пен.
Ле Пен: Мојот резултат е сензационална победа
„Голем ветар на слобода можеше да дува над земјата. Судбината на изборите одлучи поинаку“. „Пораз? Не, ова е форма на очај. Стремежот за промени не може да се игнорира“, вели Марин Ле Пен.
Ле Пен го опиша својот изборен резултат како „извонредна победа“. Резултатот од гласањето „претставува сведоштво за голема недоверба од францускиот народ“, додаде Ле Пен, уверувајќи дека „нема огорченост или гнев“.
