Саша Шотаровски, сопственик на бројни култни кафулиња во Скопје, а денес на „Бифе Тафталиџе“, тафталиџанец со „тапија“, ни зборува за Скопје пред „добрите да ги избркаат, лошите“.
А– Ме асоцира на градската фаца Анжелика Апсис со најубава насмевка во Тафталиџе и пошироко.
Б – Бурбон, затоа што тоа беше пијачката на нашата младост.
В – Васко Ташковски, гениј, секогаш ме прави среќен.
Г – Горан Џаџо најголем фраер од мојата младост.
Д – Данило Коцевски, затоа што ни остави пишани спомени за Скопје.
Ѓ – Ѓорче Петров, зашто татко ми ја возел „лимејката“ до Ѓорче.
Е– Емилија Антиќ, да не беше, уште ќе учев средно.
Ж – Живот. Градскиот живот во Скопје во 80-тите.
З– Зоки Рембрант, најдобриот врамувач на слики.
Ѕ– Ѕид. Цел живот го рушам со глава.
И– И, како идеја. Сто почнати, една остварена годишно.
Ј – „Јована Јованке“ од култната група „Леб и сол“. Ех, и тоа е Тафталиџе.
К – Костантин Качев, еден од најголемите сликари, нашинци – амбасадори во Европа.
Л – Лето. Кога убавите скопјанки со своите „штикли“ го топат асфалтот.
М– Мајка, како сите вистински скопски фраери што најмногу си ја сакаат – мама.
Н– Наше маало Тафталиџе, привилегија е да се родиш тука. Уште си тераме маалски живот.
Њ – Њоки, ама уште не можам да разберам дали е компир или е тестенина.
О – Оксиморон – нова единица мерка.
П– Перица, татко ми, затоа што се миеше на чешма во двор со прашок „Билјана“ во 70-те.
Р– „Рок Кафана Рустикана“- последната оаза на нормални луѓе во Скопје.
С – Свето Манев, мајсториште. И ќерка му Тања го заменува.
Т – Тања Балаќ, уметница, жена со големо Ж.
Ќ – Ќутек, да јадевме ќутек на време немаше да биде вака.
У– „Убавина“ од Блаже Конески. Песната инаку се вика „Починка“ ама се што е поврзано со Блаже е – убавина.
Ф– Како „Фокс“, најдобрата кафеана во чаршија во 80-те.
Х – Хипододром, добро е да се вратиме на најубавиот спорт – јавање, како што тоа го направи и ќерка ми.
Ц -Цвеќе, најголема пасија и радост. Едвај ја чекам пролетта!
Ч – Како чорапи. Како песната „Црвени штикли и црни чорапи“ од Венко Серафимов. Кој не добил „корпа“ на ова песна, немал убава младост.
Џ– Џимиринки. Мезе за боговите.
Ш – Шотаровска Билјана, столбот на нашата фамилија.
