Познатата водителка Ирена Спировска скоро 30 години ја гледаме на телевизиските екрани. Почетоците на нејзината телевизиска кариера беа во Македонската радиотелевизија, ја помниме и како бинго-девојка, а сега ја води емисијата „Везилка“ на Алфа со Благоја Грујовски и Адријана Алачки. Со Ирена ја отвораме нашата нова рубрика Асоцијации.
А – Алпи, затоа што сум вљубена во планините.
Б – Бисери, тие се најотмениот дамски моден додаток.
В – Весник, поради убавото чувство кога го прелистувам додека пијам кафе.
Г – Гамашни, дел од планинарска опрема што е задолжителен во зима кога има снег, се носи на нозете и спречува снегот да влезе во чевлите.
Д – Добрина, највредна карактеристика која може да ја поседува човекот.
Ѓ – Ѓезве, утрото не може да започне без кафе, а ни без ѓезве.
Е – Елен, бидејќи е најелегантно животно.
Ж – Живот, најдобриот учител на човекот.
З – Зорица, името на мојата мајка и на мојата ќерка.
Ѕ – Ѕуница, едно од ретките нешта на кое сите подеднакво му се радуваме и восхитуваме без разлика на возраста што ја имаме.
И – Ирис, го сакам ова цвеќе поради неговата елеганција и нежност.
Ј – Јаболко, заради неговиот прекрасен изглед, мирис и вкус.
К – Ксмет. Роди ме мајко со к’смет, фрли ме на буниште! Најголема вистина!
Л – Лешок, родното село на татко ми, мое омилено место за одмор и релаксација.
Љ – Љуботен, мојот омилен врв на Шара, а воедно и врв на кој сум била најмногу пати.
М – Мусала, најисокиот врв на Балканот и највисокиот врв на кој сум се искачила (2.925 мнв ). Секако и М како Македонија, затоа што е преубава!
Н – Наравоучение, затоа што го има буквално во сè и треба да го бараме секаде.
Њ – Њоки, моите омилени италијански тестенини.
О – Обетки, мојот најомилен моден додаток, ги имам стотина, носам обетки буквално во секоја пригода, дури и кога сум на планина.
П – Патувања, ми недостигаат последниве години. Pатувањата се доживувања кои ни го облагородуваат животот.
Р – Радост, треба да умееме да наоѓаме радост во сè што правиме, тоа е според мене формула за успех и среќа.
С – Сонцe. Зависник сум од сонце, го сакам летото и високите температури, најдобро функционирам на соларна енергија.
Т – Триглав, првиот највисок врв што го имам искачено во 1996 година. Врв поради кој се вљубува во планинарењето.
Ќ – Ќеиф, ги сакам архаичните зборови и со ќеиф ги користам при говорењето.
У – Убавина. Оној кој умее да препознае убавина и таму каде што другите не гледаат, тој има убава душа!
Ф – Фустан, отсекогаш многу сум сакала долги фустани, во долг фустан жената изгледа најженствено.
Х – Хуманост, без оваа карактеристика не заслужуваме да се нарекуваме луѓе!
Ц – Цвркот. Цвркот на птиците кога сум во природа…
Ч – Чанта, чевли, колку и да ги имаме ние жените, никогаш не ни се доволно.
Џ – Џамлии, ме потсетуваат на детството.
Ш – Шара, мојата омилена планина, прекрасна во секој период од годината.
