– Како што веќе најавивме, од среда навечер и во текот на ноќта кон четврток, кај нас доаѓа ГОЛЕМА ПРОМЕНА на времето, проследена со ПОИНТЕНЗИВНИ врнежи од дожд и со умерен, повремено ЗАСИЛЕН ветер од југоисточен правец и тоа особено изразен долж Повардарието, вели нашиот метео прогнозер Славчо Попоски.
Особено ИНТЕНЗИВНИ врнежи ќе има во западните и во југозападните предели каде локално ќе наврнат над 40 л/м2 воден талог, особено во четврток и во петок.
-Температурите на воздухот, НАГЛО и значително ќе опаднат и тоа особено од четврток кога ќе се движат во интервалот само од 9 до 17 степени, и истите ќе бидат потпросечни за овој дел од годината, додава Попоски.
Според Попоски и во Скопје и околината од среда навечер, и во текот на ноќта кон четврток следува ГОЛЕМА ПРОМЕНА на времето, проследена со врнежи од дожд, умерен, повремено засилен ветер од југоисточен правец и ЗНАЧИТЕЛЕН ПАД на температурите на воздухот и тоа особено од четврток, кога ќе се искачуваат до околу 15 степени.
Метео прогнозерот напоменува дека брзата промена на времето лошо ќе се одрази врз здравјето на луѓето, особено врз метеопатите каде што се можни и поголеми здравствени проблеми. Затоа оние метеопатите да бидат внимателни овие денови и да ги почитуваат советите од своите лекари. Исто така, поради доста интензивните врнежи од дожд од среда навечер, и тоа особено во западните и југозападните предели, можно е зголемување на нивоата на реките и на езерата особено во тој дел од државава.
