– Како што претходно најавивме, под влијание на студена воздушна маса и тоа утре особено претпладне ќе има врнежи од дожд и снег на повисоките места и на планините. Снежната покривка на планините ќе се зголемува, а формирање на снежна покривка ќе има понекаде и на повисоките места. Поради заладувањето, и тоа особено во западните и северните предели услови за провејување на снег ќе има и на некои од пониските места. Сето ова ќе биде проследено и со засилен ветер од северен и од северозападен правец. Максималните температури утре ќе се искачуваат во интервалот само од 0 до 10 степени во најтоплите предели, – вели нашиот метео прогнозер Славчо Попоски.
И во Скопскиот регион утре особено претпладне ќе има врнежи од дожд, додека на околните планини врнежите ќе бидат од снег. Не се исклучува можноста снежната граница да се спушти и на помала надморска височина и во Скопскиот регион. Ќе дува засилен ветер од северен и од северозападен правец, додека температурита ќе се искачи до околу 5 степени.
Според Попоски, потоа, поради разведрувањето, особено студени утра ќе имаме во среда и во четврток, кога минималните температури насекаде ќе се спуштаат под нулата, односно истите ќе се спуштаат во интервалот од -9 до 0 степени, а на планинските места истите има услови да се спуштат и под -10 степени.
