Серија брутални напади врз мигранти е забележана на границата меѓу БиХ и Хрватска, а покрај тепањето и грабежот на нивниот имот, пријавен е и еден случај на сексуално злоупотребување, пишува британскиот весник Гардијан.
Според извештаите на Данскиот совет за бегалци, кој се темели на сведочења на мигранти кои биле мета на напади меѓу 12 и 16 октомври, сторителите се припадници на хрватските полициски сили.
Хуманитарните работници ги опишаа фотографиите и медицинските досиеја за нападите како „болни“ и „шокантни“.
– Сведоштвата собрани меѓу жртвите на насилно враќање се застрашувачки – рече генералниот секретар на данскиот совет за бегалци, Шарлот Слент.
Таа изјави дека повеќе од 75 мигранти пријавиле „нехуман третман, тепање, па дури и сексуално злоупотребување“ за една недела.
Според мигрантите, насилното враќање се одвива на хрватска територија, во близина на пограничниот град Велика Кладуша во БиХ, поточно населбата Шиjковача, каде што има импровизирана населба со шатори, во која се засолниле околу 700 бегалци и мигранти.
– Сите лица кои разговарале со претставниците на Данскиот совет за бегалци имале видливи рани, односно модринки и посекотини, како резултат на насилството што, според наводите, го извршила хрватската полиција. Според изјавите на интервјуираните жртви, со видливи докази за повреди, насилното враќање вклучува брутално и крајно насилно однесување, деградирачки третман, како и грабеж и уништување на лични предмети – се наведува во извештајот на оваа хуманитарна организација.
Пример за сексуална злоупотреба е забележан во делот на извештајот заснован на сведочењето на група авганистански мигранти, според Гардијан.
Весникот наведува дека групата ја преминала хрватската граница од територијата на БиХ, во близина на населбата Штурлиќ, а неуниформиран полициски службеник ги пресретнал во близина на Ново Село, повикал на засилување, а потоа биле однесени во полициската станица. Два дена подоцна, тие беа однесени на суд, каде им беше кажано дека ќе бидат сведоци во случајот против еден член на нивната група, кој избегал и кој беше обвинет за насилно однесување кон полицијата.
Мигрантите му рекоа на Данскиот совет за бегалци дека полицијата потоа ги одвела на непозната локација и ги ставила во комбе каде ги пречекале десет вооружени мажи, облечени во црно, со покриени лица, со воени чизми и со фарови. Според истото сведоштво, на мигрантите им биле одземени парите, нивниот имот е уништен и им било наредено да се соблечат и да легнат со лицето свртено кон подот.
– Човек во црно стоеше на рацете на жртвата, спречувајќи какво било движење. Нозете исто така беа држени. Ако лицето се помрдне, тепањето би започнало – се наведува во извештајот, во кој се наведува дека медицинските наоди потврдиле дека раните се предизвикани од удари на камшик.
Мигрант чии иницијали се М.К. тврди дека едно од овие лица го нападнало сексуално користејќи гранка.
Лекар во Велика Кладуша, Мустафа Хоџиќ, потврди дека мигрантот има рани на грбот и нозете и дека има јасни знаци на сексуално злоупотребување.
– Никогаш не сум видел такво нешто. И покрај тоа што не ми е прв пат како лекар да ги гледам трагите на сексуално злоупотребување врз мигранти, што според нивните тврдења, го извршиле на хрватска територија хрватски службеници облечени во црни униформи – рече Хоџиќ.
Извештајот содржи и сведоштво на пакистански мигрант кој зборува за тепање на група мигранти, вклучително и малолетници.
Британскиот весник потсетува на случајот за кој пишуваа во мај годинава, кога група од околу триесет мигранти, според нив, биле ограбени од припадници на хрватската полиција, а на главите им биле нацртани крстови.
Данскиот совет за бегалци испрати претходни извештаи за наводно насилно однесување кон мигрантите до Европската комисија, со цел да се испитаат овие ситуации.
– Хрватските власти и Европската комисија мора да дејствуваат за да се запре систематската употреба на насилство. Третман на човечки суштества на овој начин, нанесување силна болка и предизвикување непотребни страдања, без оглед на нивниот статус на мигрант, не може и не треба да биде прифатен во ниту една европска земја или од која било институција на ЕУ. Постои итна потреба да се обезбедат независни механизми за набудување на границата, со цел да се спречат овие злоупотреби – нагласи Слент.
Британскиот весник не доби коментар од хрватската полиција или хрватското Министерство за внатрешни работи за последните обвинувања за злоупотреба на мигранти.
Во јуни, Гардијан откри дека официјални претставници на ЕУ биле обвинети за „срамно“ прикривање докази за неуспехот на хрватската влада да ги надгледува граничните сили.
(Извор:Гардијан)
Амнести тврди дека хрватската полиција ги тепа мигрантите кои бараат азил, има и снимки
The post ВОЗНЕМИРУВАЧКИ ФОТОГРАФИИ: Хрватската полиција обвинета за „ужасни“ напади врз мигранти на Балканската рута appeared first on Слободен печат.
ВОЗНЕМИРУВАЧКИ ФОТОГРАФИИ: Хрватската полиција обвинета за „ужасни“ напади врз мигранти на Балканската рута was first posted on октомври 21, 2020 at 2:19 pm.
