Прв и основен чекор кој води кон избегнувањето на ширењето на вирусот Ковид-19 се обидите да се намалат контактите помеѓу луѓето, односно да се избегне нивно групирање, поради што е наложено почитување на мерките за физичка дистанца и задолжително носење на маски. Едно од местата каде е неизбежен контактот со повеќе луѓе секако е јавниот градски превоз, каде неизбежните гужви се дел од секојдневието на граѓаните.
Од ЈСП Скопје најпрво го редуцираа бројот на автобуси, меѓутоа, откако започнаа да стигнуваат голем број на жалби од граѓани, кои алудираа на тоа дека ова предизвикува контраефект, односно дека поради недостатокот на автобуси се создаваат уште помоглеми гужви, градските и приградските линии полека почнаа да се враќаат во нормала.
Со уредба на Владата пак беа донесени нови правила за функционирање на градскиот јавен превоз во време на вонредна состојба, а кои вклучуваат неколку мерки: Патниците во автобусите мораат да бидат на оддалеченост од два метри, автобусите да сообраќаат со најмногу 50 отсто од целосниот капацитет од вкупниот број на седишта, не сметајќи го седиштето на возачот, како и задолжително носење на маски на сите присутни во автобусите.
За сите кои нема да ги почитуваат овие правила се предвидени и парични казни, а треба да има и надлежни лица кои ќе го надгледуваат спроведувањето на мерките.
Меѓутоа, според сведоштва на корисниците на услугите на ЈСП, се чини дека ситуацијата на терен е сосема поинаква.
До нашата редакција стигнаа поплаки од граѓани кои тврдат дека никој не врши контрола колкав број на луѓе превезуваат градските автобуси, како и тоа дека се возат и лица кои не носат заштитни маски, а никој не го почитува правилото за дистанца од два метри.
– Вчера првпат се качив во автобус откако почна пандемијата со коронавирусот во нашава земја и плус сменив четири автобуси. Никој во ниту еден автобус не контролираше дали патниците носат маски, имаше и такви кои не носеа, иако мора да признаам дека беа ретки. Нема ограничување ниту на бројот на патници кои можат во даден момент да се наоѓаат во автобусот, што значи дека повторно може да дојде до создавање на големи гужви. Луѓето седат на седиштата еден до друг – вели загрижена читателка на „Слободен печат“.
Од друга страна, од ЈСП Скопје ги демантираат овие тврдења и за „Слободен печат“ велат дека постојат лица кои го регулираат влегувањето на патниците и внимаваат на тоа кој од нив носи заштитна опрема.
„Во речиси сите возила има службени лица кои го контролираат влезот на патниците, односно се контролира дали патниците носат соодветна заштитна опрема (маска) и се регулира бројот на патници. Согласно владината Уредба за јавен превоз, во возилата е дозволено бројот на патници да биде најмногу до 50 отсто од капацитетот на возилата и граѓаните не смеат да го користат јавниот превоз без маска. Ангажираните лица не дозволуваат влез на патници без маска“, информираат од ЈСП.
За дополнително избегнување на близок контакт помеѓу луѓето во автобусите од ЈСП објаснуваат дека се работи на ставање на налепници на седиштата, кои јасно ќе укажуваат на тоа на кое седиште не смее никој да седи.
„Истовремено, во постапка сме за обележување на седиштата со налепници со кои јасно ќе биде истакнато на кои седишта не смее да се седи, како би се избегнал човечки фактор кој би го регулирал бројот на патници, а би се испочитувал протоколот за почитување на растојание, социјална дистанца во возилата на јавниот превоз“, додаваат од ЈСП.
The post Во градските автобуси никој не контролира дали се носат маски и кој каде седи, ЈСП демантира appeared first on Слободен печат.
Во градските автобуси никој не контролира дали се носат маски и кој каде седи, ЈСП демантира was first posted on јуни 9, 2020 at 1:22 pm.
