Лидерот на ДПА, Мендух Тачи во „Утрински брифинг“ на „Слободна ТВ“ денеска потенцираше дека неговата изјава за војна доколку нема албански партнер во новата власт е извртена и ставена во лош контекст, алудирајќи дека зборува за можните последици предизвикани од неговиот опонент Али Ахмети, кој не сакал да оди во опозиција.
„Барањето на Ахмети за премиер Албанец има директна закана, бидејќи тој е свесен дека ќе биде опозиција и последната алка му е национализмот и сака да ја направи тензијата голема. Бидејќи ако не биде тој во Влада, надевајќи се дека ќе биде прв кај Албанците, може да се случи сценариото од 2001. Мојата порака до граѓаните е граѓаните да не се вознемируваат, дека јас сум кандидат за заменик-премиер и ако седнам на тоа место, гарантирам дека Ахмети и ДУИ ќе го почитуваат гласот на граѓанинот и ќе бидат мирни како кокошки. Таквата реторика веќе е завршена, нема такви проекти….само за уплашени луѓе може да има такви изјави. Да не заборавиме, ние сме членка на НАТО. Сите зовриени глави на одредени радикални структури на Албанците, треба да знаат дека таквите сонови не постојат. Бидејќи кај Македонците нема можни фрустрации дека ние Албанците имаме резервни планови за Македонија. Завршена е таа приказна. Многу јаки гарантори има за нашиот идентитет, а тоа е НАТО“, порача Тачи.
Тој се наврати на политичката борба со поранешните претседатели Киро Глигоров и Бранко Црвенковски, и рече дека политичкото искуство го научило да расчисти со предрасудите.
„Јас сум имал директни политички конкуренти со кои сум се тепал со години, почнувајќи од претседателот Глигоров до премиерот Црвенковски. Од оваа дистанца многу ги ценам двајцата и сакам и мене да ме ценат така. Во мојата политичка кариера имав многу политички јаки изјави, можеби други ги толкуваа како непромислени, но успеав да одржувам мир, или сите можни конфликти да ги менаџираме со многу мали последици. Напротив, мислам дека политичките партии на Македонците, му даваат значење на Ахмети и ви се молам да не се занимавате со таа глупа идеја, со која се бори за својата лична кожа“, порача лидерот на ДПА.
Според Тачи, изјавите на Ахмети најмногу ги омаловажуваат Албанците и смета дека Ахмети ги потценува гласачите.
„Ништо не би имал против кога не би имало категоризација како од 15 век. Тој не ги разбира политичките поими. Претседателот Обама беше кандидат на политичка партија од политичка опција, а не само за една раса. Ова е јалова, последна битка на Ахмети за да си ја спаси кожата. Да беше сериозна понудата на Ахмети, каков Насер Зибери, самиот Али Ахмети ќе се кандидираше“, рече Тачи.
Воедно тој тврди дека кандидатот за премиер на ДУИ, Насер Зибери дека подлежи на одговорност за напад врз ДПА во време кога беше заменик-премиер. Мендух Тачи тврди и дека Ахмети и Насер Зибери немаат допирна точка ниту со Рамковниот договор.
Во неговата политичка понуда за изборите на 15.јули, Тачи вели, се залага за правилна распределба на државниот буџет и правни акти кои ќе ги заштитат Албанците од дискриминација.
„Ми се гади кога моите зборови ќе ги слушнам од устата на Ахмети. Тој како добар, интегриран политичар кој зад себе има 227 убиства само во Тетово, вика ќе ги делел граѓаните на Македонци и Албанци и ќе го делел буџетот така. Јас сум против тоа. Јас инсистирам дека Тетово е дискриминирано кога е во прашање здравството. А во Тетово не живеат само Албанци. И кога ќе рече некој дека Македонците се иселуваат од Тетово поради опресија од Албанците, јас тврдам дека не е така, туку се иселуваат бидејќи нема инфраструктура, се чувствуваат дискриминирани од страна на државата што нема инвестиции. Никој не бара фаворизација туку правни механизми во системот, кој ќе оневозможува дискиминација на одредена група. Буџетот е злоупотребен не само поради етнички, туку и поради политички, партиски, групни и фамилијарни причини“, порача првиот човек на ДПА.
Тој потенцира дека не ничија политичка алка за следните избори, а напомена дека не треба да се оспорува заслугата на Заев за Преспанскиот договор и влезот во НАТО, притоа тврдејќи дека поранешниот премиер Груевски пред самитот во Букурешт прифатил „Република Македонија (Скопје)“.
„Груевски пред самитот во Букурешт го прифати името „Република Македонија (Скопје)“и се договоривме на лидерска средба дека со претседателот Црвенковски треба да одат во Букурешт и ако прифатат Грците, тие да се вратат и во Парламентот со дво-третинско мнозинство истиот ден да го изгласаме договорот. Н,о после тоа Груевски ја сметаше мојата цврста одлука за тешко предавство, па се договори со ДУИ и си тераа 10 години“, изјави Тачи во Утрински брифинг.
Тој на изборите на 15.јули кога е во прашање ИЕ6, смета дека фаворит е СДСМ, а дека битката ќе се води меѓу останатите понуди на партиите од албанскиот блок.
The post Тачи: Ахмети создава тензии со барањето за премиер Албанец, гарантирам, ако станам заменик-премиер, ДУИ ќе бидат мирни како кокошки (ВИДЕО) appeared first on Слободен печат.
Тачи: Ахмети создава тензии со барањето за премиер Албанец, гарантирам, ако станам заменик-премиер, ДУИ ќе бидат мирни како кокошки (ВИДЕО) was first posted on јули 8, 2020 at 11:30 am.
