Секој се снаоѓа како што знае и умее – таква е моментно состојбата во сите семејства каде што има ученици кои веќе 15 дена седат дома поради пандемијата со коронавирусот и практикуваат учење на далечина. Приказните се разновидни, а комбинациите бескрајни затоа што дел од училиштата и наставниците добро се снајдоа и брзо ги организираа предавањата и задачите, но има и примери во кои родителите се оставени сами на себе. Во некои семејства со поголеми ученици родителите се уште одат на работа и немаат многу контрола колку и што учат нивните деца, а има и повеќедетни семејства каде физички е невозможно секое дете да ја следи наставата преку комјутер или мобилен телефон. И самата технологија е проблем, затоа во многу семејства немаат компјутери туку само мобилни телефони и се случува да не можат да ги отвараат документите што ги испраќаат наставниците.
Во игра се сите начини на комуникација на кои можеле да се сетат наставниците, учениците и родителите. Тие комуницираат во групи на вибер, месинџер или други апликации, одржуваат видеоконференции преку скајп, учениците ги фотографираат изработените задачи и ги испраќаат на мејл итн. Од вчера на сите им е на располагање и веб-страницата www.eduino.gov.mk што ја изработи Министерството за образование на која се поставени 15-минутни видеопредавања што се снимени од наставниците за сите задолжителни предмети.
– Програмата воопшто не е скратена и наставниците постојано ни испраќаат материјали за учење. По цел ден учиме и пишуваме домашни задачи. И покрај големиот труд што го вложувам, успеваме да поминеме до околу 90 отсто од зададениот материјал. Учењето на далечина тешко ни падна на сите – вели една самохрана мајка на четири деца, ученици во основно образование.
Таа и самата е наставничка по англиски јазик и вели дека поради тоа не и е толку тешко да им предава и на сопствените деца, а олеснување и е и што поради вирусот не оди на работа.
– Образовната програма на МТВ не ни беше многу од корист затоа што наставниците предаваа на здодевен класичен начин и воопшто не го задржаа вниманието на моите деца. Одредени предмети се голем проблем, на пример лекциите по информатика ни е тешко да ги совладаме дома и тоа создава големи нервози и фрустрации. Слично е и со лекциите по математика, затоа што не е секој математичар за да може дома да им објаснува да децата од повисоките одделенија и јас се консултирам со колешки по математика. Тешко е и со лекциите по германски јазик, кој слабо го познавам и не можам да го исправам детето ако греши – вели оваа мајка.
Таа ни раскажа и пример како се снашла нејзина колешка, наставничка на второоделенци, која преку апликацијата зум секој ден во одредено време им одржува предавања на децата. Сите истовремено се приклучени и ја следат наставничката, а предавањата се снимени во апликацијата и можат повторно да се гледаат.
Друга мајка, која оди на работа и тоа во смена од 12 часа е револтирана од целата ситуација затоа што иако сака да му помогне на своето дете во учењето на далечина – едноставно нема време.
– Многу ми е тешко. Моите деца се седмо и девето одделение. Немаме добар комјутер, децата се снаоѓаат со телефони, но јас голем дел од времето не сум дома и не можам да им помагам во наставата. И секако, не ни знам да им помогнам по секој предмет. Се враќам дома преморена, а работи и сопругот. Како да им помогнам? Треба да ги фотографираат домашните задачи и да ги испраќаат по мејл, а ние во моментов тоа не можеме да го правиме поради застарените уреди што ги имаме дома – вели таа.
Има ситуации и кога родителите заради вирусот овој период работат од дома, па и тие се жалат дека немаат доволно време.
– Што поскоро да правиме во денот? Имаме три деца основци, а двајцата родители сега работиме од дома. Тоа значи дека комјутерот во најголем дел од денот е зафатен за нашите потреби и децата не можат да дојдат на ред. Добро е што наставничките еднаш неделно на сајтот на училиштето прикачуваат материјали по секој предмет за целата недела, па им ги принтаме задачите и наставните листови дома. Еднаш неделно треба да ги испраќаме сработените домашни на мејл. Се снаоѓаме, но ваквниот начин на учење од дома е некако прикрпен и неосмислен. Ова треба да е лекција и за надлежните од Министерстворо за образование да почнат да прават повеќе алатки за учење од дачечина – вели таа.
Една мајка, пак, ни раскажа дека нема особени проблеми, затоа што училиштата на нејзините деца добро се организирале.
– Син ми е осмооделенец и слуша предавања на апликација преку видеоконференциска врска на која се прикачуваат наставници по неколку предмети. По другите предмети не добиваат материјали за учење, туку изработуваат проекти дома. Ќерка ми е матурантка и сега најмногу се интересира за тоа дали и како ќе полагаат матура. Јас мислам дека за дел од проблемот придонесуваат и некои родители кои не си ги познаваат доволно децата, кои пред оваа ситуација воошто не се интересираа за тоа што учат тие на училиште, а сега се затекнати и не знаат да се снајдат – вели оваа мајка.
Родителите велат дека засега немаат насоки како ќе се врши тестирањето и оценувањето, а не е јасно и кога ќе бидат уписите за следната учебна година и полагањата на матурските и приемните испити.
The post Образование во вонредна состојба: Снајди се па учи appeared first on Слободен печат.
