Германската канцеларка Ангела Меркел апелира до граѓаните на дисциплинирано однесување и придржување до новите мерки на затворање што се воведени од денеска и ги урна надежите дека по четири недели, колку што рестрикциите ќе останат на сила, би било можно брзо враќање во нормала.
– Мора да се подготвиме за Божик во сенка на коронавирусот. Но, тоа не мора да биде Божик на осаменост, рече Меркел по состанокот на т.н. „корона-кабинет“.
Таа, истовремено, дека ќе нема вообичаени дочеци на Нова година.
– Неконтролираните силверстерски забави или масовни дочеци на Нова година нема да бидат можни. Светлото на крај на тунелот сè уште е многу оддалечено, порача Меркел.
Германскиот вирусолог Дрoстен со прогноза: Пандемијата на ковид нема да стивне до Велигден
Таа уште еднаш ги повика граѓаните да се придржуваат до досегашните и до новите мерки во борбата против ширењето на ковид-19.
– Секој од нас одлучува за тоа дали овој ноември ќе го паметиме како заеднички успех при што клучно е придржувањето до мерките, нагласи германската канцеларка.
Меркел појасни дека актуелната ситуација со порасот на бројот на инфицирани сè уште дава повод за загриженост.
– Ние денеска бележиме тројно поголем пораст на бројот на заболени во споредба со средината на октомври. Ако вака продолжи, ќе дојде до оптоварување на болничките капацитети, предупреди Меркел и додаде дека треба да се дојде до ситуација во која повторно ќе биде можно следење на заразата што не е можно некое време.
Формула за успех – намалени контакти, работа од дома, избегнување на посети и славења
Германската канцеларка објасни дека бројот на новозаболени во Германија во последните 24 часа е 127 на 100.000 жители и дека целта е тој да падне под 50.
– Мора да ги намалиме контактите, што е можно повеќе да се работи од дома, да се избегнуваат посети на роднини, како и славења. Со тоа би создале услови за поднослив декември, рече Меркел со дополнување дека го разбира незадоволството кај некои од новите мерки, но, исто така, дека е нејзина задача да ги увери луѓето за неопходноста на тие мерки.
Одговарајќи на прашање зошто е забранета посета на угостителски објекти и театри, но не и на цркви и на училишта, германската канцеларка го образложи со уставно-правни причини.
– Правото на образование и практицирање на верата заземаат висока позиција во Уставот и таа одлука е донесена со стручњаци по уставно право, нагласи Меркел.
The post Меркел се обрати на јавноста: Заборавете на забави и на масовни дочеци на Нова година appeared first on Слободен печат.
Меркел се обрати на јавноста: Заборавете на забави и на масовни дочеци на Нова година was first posted on ноември 2, 2020 at 6:39 pm.
