ИНТЕРВЈУ со Благој Нацоски од Италија: Срамота е еден лекар помалку да заработува од еден фудбалер

Разговараме со нашиот најпознат оперски пејач во светот, Благој Нацоски, кој живее и работи во Италија.

Гледаме дека е многу сериозна ситуацијата со коронавирусот во Италија, како ти се снаоѓаш во целата ситуација?

– Едноставно се чувам што е можно повеќе, почитувајќи ги сите мерки и препораки. Како и да е, ситуацијата во Италија, бавно, но оди кон подобрување, преземените мерки почнаа да даваат резултати. Со оглед на тоа што Италија беше прва земја која е на силен удар од оваа епидемија, значи и прва воведе строги мерка, прва и ќе излезе во Европа. Иако за целосна нормализација на животот, мое мислење е дека без сериозна фармаколошка терапија и/или вакцина целосна нормализација на животот нема да има никаде на планетата. На пример, театрите, кината, концертните сали ќе бидат последни кои ќе отворат.

Сите настапи и културни настани се стопирани, како лично ја одржуваш својата кондиција на гласот?

 – Нема друг начин освен да вежбам и пејам секој ден. Во овој период дури го чувствувам гласот и „посвеж“, постојано одморен.

А како ја одржуваш менталната кондиција?

 – Не знам ни самиот. На моменти се прашувам и самиот како успевам да бидам постојано оптимист, ведар и позитивен. Дури се трудам постојано истото да го пренесам и на другите, на моите најблиски, на пријателите, како и на фановите преку социјалните мрежи. Можеби токму увидувајќи дека таа моја ангажираност дава резултати, ме прави среќен и ми дава уште повеќе ентузијазам.

Дали италијанската Влада има предвидено некакви мерки за поддршка на уметниците кои останаа без ангажмани поради состојбава и веројатно, така ќе биде и во наредниве неколку месеци?

– Италијанската Влада во првиот месец од кризата даде една мала финансиска помош до сите нас уметниците, но навистина таа цифра е мизерна. За април, најверојатно ќе биде зголемена, но сепак незадоволителна ако земеме в предвид дека Германија им даде 5.000 евра на нашите колеги таму. Асоцијацијата на оперски пејачи, режисери, диригенти АСОЛИРИКА, во која јас членувам од нејзиното основање, работи секојдневно на случајот барем сите оние настапи што ни се откажани сепак да ни бидат платени, како што е впрочем и во другите европски земји. Тоа не би требало да претставува проблем од две причини. Прво, средствата за сите овие настани се одобрени уште во 2019 година така што тие средства нема да бидат нови, и второ, кое особено ме радува меѓу другото, за сите претстави во овој период, во сите италијански градови публиката не си ги бара назад парите од билетите или претплатите. Во овој контекст ќе ви дадам и друг пример: пред неколку години во Њујорк две претстави ми се откажаа поради тоа што беше прогласена дводневна вонредна состојба во градот поради невреме од снег, буквално градот беше блокиран и не можевме да излеземе од дома. Њујоршката Опера сепак, ми ги плати и двете откажани претстави.

Како тебе лично ти се смени погледот на светот од времето пред коронавирусот и денес?

 – Многу мисли ми се вртат во глава и веројатно и понатаму ќе ми се вртат околу ова прашање. За вирусот како вирус никој не е виновен, освен можеби за нас чудните навики да се јадат лилјаци или слично, но не се осудувам да судам ниеден народ за такво нешто. Нормално, во ова глобализирано време невозможно е да се спречи еден таков вирус да се рашири брзо насекаде. Единствено сметам дека во последниве триесетина години и повеќе, политичките претставници во сите земји на светот се тотално неспособни, односно нивните приоритети се погрешни. Се надевам дека сега ќе се свестат дека за здравството ниедна влада во светот не треба да штеди, дека треба силно да се поддржува науката, односно медицинските истражувања итн. Превенцијата спасува многу повеќе животи отколку да се делува во последен момент. Срамота е еден лекар помалку да заработува од еден фудбалер. Инаку ако ова може да го сметаме за Трета светска војна, дефинитивно Кина е победник со ниту еден испукан куршум. Од друга страна, дефинитивно САД не се повеќе лидер на светот.

Што прво ќе направиш откако ќе заврши целата оваа страшна ситуација?

– Ќе одам да си го видам моето семејство во Македонија.

The post ИНТЕРВЈУ со Благој Нацоски од Италија: Срамота е еден лекар помалку да заработува од еден фудбалер appeared first on Слободен печат.