Одложувањето на долгонајавеното рестартирање на преговорите меѓу Белград и Приштина отвори многу анализи и сомневања за вистинските намери и сценарија за иднината на косовскиот статус.
Долгонајавуваната средба на српскиот и косовскиот државен врв кој за утре беше закажан во Вашингтон, во посредство на американската амдинистрација, е одложена, откако неочекувано беше подигнато обвинение за сторени воени злосторства на престедателот Хашим Тачи, поранешниот спикер на косовскиот парламент Кадри Весели и уште деветмина поранешни команданти на ОВК.Тие од специјалниот хашки суд за Косово се обвинети дека како воени команданти на ОВК во 1999 година сториле воени злосторства и злосторства против човештвото.
Овој неочекуван потег на обвинителство предизвика, главните учесници на преговорите од косовска страна да ја одложат средбата во Вашингтон. Обвинетиот претседател Тачи како обвинет, а премиерот Хоти, под образложение дека треба да остане во Приштина и да се обиде да ја надмине новонастанатата ситуација.
Западните дипломати во Приштина веќе долго се сомневаат дека претседателот Тачи се надева на американска заштита – со поставувањето како неопходен партнер кон Вашингтон, Тачи наводно сакал да ја придобие американската политичка поддршка за да избегне обвинување за воени злосторства. Оттаму и заложбата на Тачи да се прифати американскиот план за Косово, кој подразбира демаркација на границата меѓу Косово и Србија, или грубо речено размена на територии.
Овој план никако не и оди во прилог на администрацијата во ЕУ, бидејки во Брисел се стравува дека ваквиот план би можел да предизвика домино ефект и врз останатите држави на европскиот континент, но и држави членки на ЕУ. Брисел предводен од Германија се залага двете држави, Косово и Србија да влезат во ЕУ, каде, откако би влегле, меѓусебните граници нема да имаат големо значење. Но, откако европјаните го загубија посредстсвото во преговорите меќу Белград и Приштина, и тие ги презеде САД, започна да се турка идејата за промена на гранците на Балканот.
Мотивот на администрацијата на Трамп е преку таканаречената булдожер дипломатија, во пресрет на изборите во САД на 3 ноември, да се реши косовскиот статус во најбрз можен рок, па по цена да дојде и до промена на границите. За таа операција според пишувањата на западните медиуми беше ангажиран косовскиот претседател Хашим Тачи, кој би учествувал во постигнувањето на договорот по американски урнек, а за возврат би се надевал на добивање заштита од Вашингтон околу евентуалните обвиненија кон него. Познат е ставот на Тачи кој често ја критикува ЕУ и ја фали Белата куќа за која вели дека делува побрзо, попрецизно и поефикасно од Европејците. „Доколку за нашите земји има светло на крајот на тунелот, тогаш тоа доаѓа од Вашингтон“, е на многупати повторената реченица на Тачи.
Пред три месеци падна владата на АЛбин Курти, каде Тачи имаше голем удел од заднина, само затоа што Курти се противеше на американскиот план за демаркација на границата меѓу Косово и Србија.
Сега преговорите се чини дека се во ќорсокак. Неизвесна е политичката позиција на Тачи кој како престедател на Косово има мандат до 2021 година. Исто така, обидите на владата на Косово најверојатно ќе одат во насока, прегворите да се пролонгираат до завршувањето на претседателските избори во САД. Една од опциите е дека доколку дојде до промена на администрацијата на Белата Куќа, ќе се смени и политиката и медијаторството, во кое Приштина ќе се надева на подобар исход од решавањето на косовската државност.
Се чини дека интересот на Русија околу решавањето на статусот на Косово е близок до европскиот наспроти американскиот. Москва се противи на решавањето на косовскиот статус со размена на територии. Русија одбива да признае поставување на нови граници на Балканот и засега и одговара статус кво ситуација, во која гледа можност да го продолжи своето присуство на Балканот. Секое решавање на косовскиот статус отвара можност новата држава Косово и Србија, да бидат интегрирани во НАТО и ЕУ, се вели во често повторуваниот став на Москва.
Оттаму и заклучокот, дека и ЕУ и Русија засега се противат на брзиот план на администрацијата на Трамп по секоја цена да го реши косовскиот проблем, што според анализите би било прикажано во јавноста како голем меѓународен успех на Трамп во пресрет на американските претседателски избори.
The post Андоновиќ: Европа ги урна преговорите на Трамп за поделба на Косово? (ВИДЕО) appeared first on Слободен печат.
Андоновиќ: Европа ги урна преговорите на Трамп за поделба на Косово? (ВИДЕО) was first posted on јуни 26, 2020 at 9:48 am.
