Есента и календарски ни пристигна и деновиве изобилува дожд. И тоа одлично се совпадна со креативната работа на една креативна дама. Симона Јовчевска зрачи со позитивност, а тоа го пренесува и во креативната работа.
Накратко кажи ни која е Симона Јовчевска, со што се занимава покрај креативното хоби?
– Ова прашање ми создаде една убавa насмевка на лицето … Патувајќи низ животот со една голема љубопитност, верувам дека човек може да биде се она што ќе посака да биде. Она кое до сега го создава мојот идентитет е музиката , која сум со неа од мојата најмала возраст другарувајќи со пијаното, инаку, дипломиран соло- пеајач, вработена во националната Опера и Балет како хорист и момнетално студент, втора година на институтот по пихологија на универзитетот „Св. Кирил и Методиј ”.
Твоите чадори се вистински хит низ градот. Имаат уникатни пораки и цртежи. Дали клиентите ти оставаат одврзани раце или стрикно работиш по нарачки?
– Станува збор за спој на тие две работи, нарачкате и одврзаните раце и како јас сето тоа ќе го пренесам на чадорот. Сепак тематиката и насоката е онаа која што клиентите пред се ја изразуваат како нивна желба.
Што е потребно за нивна изработка, со какви бои работиш и колку време ти е потребно?
– Чадор пред сè… Се шегувам, но секако, чадорот е моето платно. Она што е потребно се текстилни бои, добри четки и секако инспирацијата, баш онаа од која ми зависи и времето на изработка. Кога е голема нештата се случуваат во еден здив, но понекогаш ми се потребни и денови… Некако најдолго време ми одзема процесот што се случува во мојата глава, откако добро ќе го визуелизирам, времето поминато во цртање е многу пократко….
Постои ли некој цртеж кој навистина ти бил предизвик и тежок за изработка и зошто?
– Ух.. Ги има повеќе.. Тежината првенствено доаѓа од таа нерамна површина која ја има чадорот.. Мора да сте многу прецизни во се, една погрешна црта, и се добива поинаков израз. Другата тежина е што цртам од мојот инстикт, немам уметничко школо, кое веројатно многу би го олеснал целиот процес, така да со секој предизвик имам можност да се откривам и самата себе (се смее, н.з).
Дали може од ова хоби добро да се заработува?
– Да , може да се заработува, но на ниво на нашата економска состојба во државата. Затоа ми е тешко да го дефинирам како добра заработка … Работите повеќе, добивате помалку во овој случај…а под добра заработка би било, работите помалку добивате повеќе или доволно за она што е сработено. Но со оглед дека ми е хоби и навистина сакам да се шири оваа убава магија низ дождливите улици, се прилагодувам на цена која е достапна за повеќето.
Дали некој од твоите уникатни чадори е „прошетан“ по скопските улици од некоја позната личност?
– За мене сите кои што веќе имаат уникатен исцртан чадор се веќе познати личности … И на ова убаво си се насмевнав …
Од она што кај нас е естрада, и што ги толкуваме како познати личности, не . Освен Васил Гавранлиев за кој имам исцртано чадор на кој го поклонив, поради една прекрасна соработка во доменот на класичната музика во која настапувавме заедно.
А во кругот на афирмирани музичари од областа на класичната музика, кои за мене се од големо значење и личности со реноме, тогаш одговорот е – да .
За сите заинтересирани читатели кажи ни каде може да се нарачаат и купат овие прекрасни чадори?
– Сите оние кои што сакаат да ги разубавуваат дождливите улици и сакаат да ја шират оваа убава магија, можат да ме пронајдат на социјалните мрежи:
Facebook : Симона Јовчевска
Instagram: Simona Jovcevska
