Кога ќе се спомне руска кујна нешто што прво ви доаѓа на ум е руската салата која е особено популарна во овој период. Типично за руската кујна е што изобилува со богатство од рецепти чии главни состојки се риба, живина, печурки, шумски бобинки и мед во десертите.
За денес ќе ви подготвиме еден колач со урми и ораси попознат како руски колач кој често се приготвува во руските домаќинства. Стар рецепт, но вкусот е незаборавен и кога ќе го направите еднаш ќе сакате да го правите многу почесто.
Состојки:
– 3 јајца
– 250гр шеќер
– 250гр сецкани ореви
– 100гр суво грозје
– 100гр урми
– 4 лажици брашно
– 1 кесичка прашокпециво
Подготовка:
Во подлабок сад убаво изматете ги јајцата заедно со шеќерот. Потоа додадете го брашното и прашокот за пециво. Измешајте убаво за да добиете хомогена смеса.
Исчистете ги урмите од семки и исечкајте ги на ситни парченца. Исчистените ореви исецкајте ги, но на покрупни парчиња и измешајте ги со урмите во еден сад.
Со постепено мешање почнете да го додавате миксот од овошје во смесата со јајца и брашно за убаво да се распоредат секаде низ тестото.
Сипете го колачот во подлабок калап и печете на претходно загреана рерна од 180 степени. Со чепкалка проверувајте која ќе биде убаво испечен.
Добар апетит!
