Со години наназад, зад еден од најпознатите хитови на Индира Радиќ се врзуваше приказна за трагична љубов и вистински животен настан. Песната „Змај“ доби статус на безвременски хит, а многумина веруваа дека текстот е напишан врз основа на вистинска љубовна драма.
Според една широко распространета приказна, станувало збор за љубов на две млади лица кои се запознале уште во средно училиште. По десет години врска, ја закажале својата свадба, но девојката наводно дознала дека боледува од рак на панкреасот во напредна фаза. Венчавката била откажана, а таа од болничкиот кревет му напишала писмо на саканиот, со зборови идентични на текстот од песната, со молба да го прочита по нејзината смрт. Тој, според легендата, го отворил писмото истата вечер, а следното утро дознал дека таа починала. Наводно, по години го продал писмото на Марина Туцаковиќ, која прво сакала песната да ѝ ја даде на Цеца Ражнатовиќ, но на крајот ја испеала Индира Радиќ.
Оваа приказна долго време кружеше по социјалните мрежи и музичките платформи, предизвикувајќи силни емоции кај публиката.
За првпат јавно, Марина Туцаковиќ реши да стави крај на шпекулациите и да ја открие вистината за настанувањето на песната „Змај“.
„Со години слушам разни легенди за оваа песна, толку многу што слободно може да се сними филм. Но, ниту една од тие приказни нема врска со вистината, особено не со трагични настани“, изјави таа.
Како што објасни Туцаковиќ, песната настанала сосема поинаку. Композицијата ѝ ја донел Горан Ратковиќ Рале, а музиката ја инспирирала да напише текст кој не се темели на ниту еден вистински животен настан.
„Песната беше објавена во 2003 година, што значи дека нема никаква временска врска со приказните што се прераскажуваат. Ќе разочарам многумина, но зборовите во ‘Змај’ не се засноваат на никаква вистинска љубовна трагедија“, беше децидна Марина.
