Бугарската поп-фолк пејачка Галена ја објави новата песна „Чатџипити“, инспирирана од популарниот чет-бот со вештачка интелигенција. Песната беше промовирана со видеоспот на Јутјуб, како и на социјалните мрежи, каде што пејачката се пошегува дека и самата го „прашала Чатџипити“ како да го промовира новиот сингл.
Иако насловот е инспириран од вештачката интелигенција, во песната Галена пее за љубовта. Чатџипити е претставен како своевиден љубовен советник од кој пејачката бара одговори на своите емотивни дилеми, а во стиховите се споменува и терминот „промпт“.
Видеоспотот е снимен во футуристички стил и во него се појавуваат хуманоидни роботи. Во една од сцените два хуманоида се борат меѓу себе, а победникот добива романтична филмска вечер со Галена.
Песната предизвика бројни реакции на социјалните мрежи, каде што публиката го коментира необичниот спој на поп-фолк музиката и вештачката интелигенција.
