Драган Спасов – Дац и Александар Митевски веќе неколку години важат за едно од најпрепознатливите музички дуоа на домашната сцена. Сѐ започна во 2019 година со песната „Цреши охридски“, продолжи со хит-баладата „Уште ми фалиш“, а за време на пандемијата го одбележаа периодот со песната „Корона чао“. Денес, зад себе имаат повеќе од дваесет песни кои редовно се пеат на нивните настапи низ Македонија.
Во саботата, дуото настапи во познат ресторан во Кавадарци, каде што заедно со пејачката Маја Гроздановска – Панчева им приредија пријатна и емоционална музичка вечер на присутните гости. Вечерта помина во знакот на безвременските евергрини, добро расположение и непосредна комуникација со публиката.
За време на настапот, Дац и Александар направија гест кој привлече особено внимание на социјалните мрежи. Тие решија музиката да ја однесат и до вработените во кујната, кои во тој момент биле на работна смена. На видеото што го објавија на Инстаграм се гледа како Александар Митевски им приоѓа, им пее и лично ги поздравува.
„Кога тие се на смена и имаат работа, ние доаѓаме кај нив да им ја исполниме музичката желба. Поздрав до кујна и целиот колектив на ресторанот“, напишаа тие во описот на видеото.
