По трагедијата што се случи во швајцарскиот ски-центар Кран-Монтана, каде животот го загубија 40 лица, пејачката Сека Алексиќ се огласи на социјалните мрежи со јавен апел до сопствениците на ноќни клубови.
Таа повика да престане со користењетоо пиротехника во затворени простории, нагласувајќи дека станува збор за сериозна безбедносна закана.
View this post on Instagram
„Ги молам сите сопственици на клубови да престанат да користат пиротехника во затворени простории. Прво, апсолутно не е безбедна. Второ, ги гуши луѓето што се во клубот. И трето, доколку сакате пијалакот на гостите да го донесете на театрален начин, постојат LED светла кои се исто така впечатливи и никому не му пречат“, порача Алексиќ.
Таа додаде дека ваквите ефекти не се вредни по цена на човечки животи и повторно апелираше да се прекине со ваквата практика.
Во меѓувреме, градоначалникот на Кран-Монтана, Николас Феро, изјави дека барот во кој избувнал пожарот за време на новогодишната ноќ немал спроведено безбедносни проверки или ревизии во последните пет години.
На прес-конференција, Феро истакна дека засега нема објаснување зошто контролите не биле извршени, како и дека градските власти во моментов разгледуваат повеќе точки од локалната регулатива. Дел од истрагата, меѓу другото, ќе утврдува дали противпожарните апарати биле редовно одржувани и дали објектот ги исполнувал основните безбедносни стандарди.
