Платформата Нетфликс во знак на поддршка на украинскиот народ пред руската агресија, на Јутјуб го објавија својот документарец „Winter on Fire: Ukraine’s Fight for Freedom“, за што повеќе луѓе да можат бесплатно да го гледаат.
„Winter on Fire“ беше премиерно прикажан на Нетфликс во 2015 година и беше пофален од критичарите. Тој е номиниран за Оскар и Еми, а ја освои и наградата за најдобар документарен филм на Меѓународниот филмски фестивал во Торонто.
Овој филм, кој дава увид во украинската политика и подготвеноста на луѓето да се борат за своите верувања, повторно е актуелен по руската инвазија на Украина. Статистиката на Јутјуб покажува дека 98-минутниот документарец моментално има повеќе од половина милион прегледи, а објавен е на 5 март 2022 година.
Режисер на документарецот е Евгениј Афинеевски. Во соработка со Нетфликс, филмот го продуцирале Украина, САД и Обединетото Кралство.
Филмот ја прикажува полициската бруталност и кршењето на човековите права низ кои поминувале грашаните на Украина во 2014 година, а дури и филмската екипа имаше потешкотии да снима во тие околности.
Приказната следи како во 93 дена граѓанското востание познато како Мајданска револуција се претворило во серија на насилство и уништување. Протестот беше насочен против владата на претседателот Виктор Јанукович, кој одби да потпише договор за политичко здружување и слободна трговија со Европската Унија. Наместо тоа, тој се поврза со Русија и Евроазиската економска унија, и покрај проевропската ориентација на украинската влада. Судирот меѓу Беркут (специјална полиција) и демонстрантите резултираше со неколку смртни случаи.
