Откако се појави веста дека на 83-годишна возраст почина кралицата на „рокенролот“ Тина Тарнер, многумина се потсетуваат на моментите кои ја одбележаа нејзината кариера, а во врска со тоа се појави и фотографија од нејзината посета на Белград.
Имено, од нејзината смрт на социјалните мрежи се споделува црно-бела снимка на која се гледа како младата Тина јаде во ресторан во Скадарлија.
Иако на фотографијата не може јасно да се види што јаде, оние кои соработуваа со пејачката велат дека таа била воодушевена од ќебапите.
Фотографијата е направена пред нејзиниот прв концерт во овој град, кој се одржал на 2 ноември 1974 година.
Шест пати ја посетила поранешна Југославија – била во Белград во 1974, 1979 и 1990 година, а била и во Љубљана во 1974 и 1975 година. Настапувала и во Велика Горица во Хрватска во 1990 година.
На Фејсбук е достапна снимка од дел од тој настап.
Деталите за концертот во Белград од 1990 година ги откри српскиот новинар и публицист Срѓан Стојановиќ, кој го организирал настапот, пренесува „Ало.рс“.
– Тина Тарнер е многу едноставна, природна жена. Едноставно зрачи, чувствуваш љубезност и топлина, дека е посебна личност која го дели подарокот што Бог и го дал на сите околу неа. За мене, запознавањето со неа беше навистина трогателно. Тие концерти, кои се изведуваат од 150 до 200 пати за време на едногодишна турнеја, не се многу различни во Белград, Лондон, Париз или Будимпешта. Има сет песни, може да се разликува по песна или две, во зависност од расположението, но кореографијата секогаш има ист тек. Концертот беше феноменален, во секој поглед на највисоко ниво – рече тој.
Да потсетиме, Тарнер почина на 24 мај на 83-годишна возраст по долго боледување. Таа страдаше од лоша здравствена состојба во последниве години, а во 2016 година ѝ беше дијагностициран рак на дебелото црево, а потоа беше подложена на трансплантација на бубрег во 2017 година, кој ѝ го донираше лично сопругот.
