Тужбите против Мајкл Џексон за сексуална злоупотреба на деца, поднесени од Вејд Робсон (40) и Џејмс Сејфчак (45), би можеле повторно да бидат отворени против компаниите на пејачот, јавува BBC.
И двајцата тврдат дека Џексон ги злоставувал во доцните 1980-ти и раните 1990-ти додека престојувале на неговиот ранч Неверленд.
Оваа информација првпат беше слушната во документарната серија на HBO од 2019 година, Leaving Neverland. Тогаш роднините на уметникот, кој почина во 2009 година, го критикуваа филмот и рекоа дека тоа не е ништо повеќе од јавен линч на музичката легенда.
Робсон и Сејфчак поднесоа тужби во 2013 и 2014 година против MJJ Productions и MJJ Ventures, продуцентските компании на Џексон, кои беа во сопственост на пејачот во моментот на неговата смрт. Тужбите беа отфрлени во 2017 година поради застареност, но во 2020 година, новиот закон во Калифорнија го продолжи статутот на застареност за преживеаните злоупотреби на деца, дозволувајќи два случаи да бидат повторно отворени.
Во 2020 и 2021 година, судија од Лос Анџелес повторно ја отфрли тужбата, пресудувајќи дека компаниите „немаат законска способност“ да го контролираат Џексон бидејќи тој бил единствен сопственик на компанијата.
Сега, сепак, случајот сè уште може да добие нова актуелност бидејќи комисијата од тројца судии на Вториот апелационен суд во Калифорнија рече дека не се согласува со судијата и нагласи дека случајот може да оди на порота, однсоно во судница.
Робсон тврдеше дека Џексон го малтретирал и сексуално го злоставувал од седум до 14 години, а Сејфчак- дека бил малтретиран и сексуално злоставуван околу четири години, почнувајќи од крајот на 1988 година кога имал 10 години. И двајцата велат дека вработените во компанијата на Џексон не ги заштитиле соодветно од пејачот, помагајќи да се координираат посетите на Неверленд и да се осигураат дека Мајкл би можел да биде сам со нив.
Џонатан Стејнсапир, адвокат во случајот Џексон, продолжува да инсистира дека уметникот бил невин и е уверен е дека тужителите се водени само од алчност за пари.
„Остануваме целосно уверени дека Мајкл е невин за овие обвинувања, кои се спротивни на сите веродостојни докази и независни потврди, а кои првпат беа направени само неколку години по смртта на Мајкл од луѓе мотивирани исклучиво од пари“, нагласи тој, коментирајќи ја одлуката на судот.
Адвокатот пак, на тужителите, Винс Финалди, е задоволен што судот ги поништи „погрешните“ одлуки, кои адвокатот ги опиша како спротивни на законите на Калифорнија.
За време на неговиот живот, Џексон се соочи со две истраги за наводи за сексуална злоупотреба на деца. Во 1994 година, обвиненијата беа отфрлени откако главната наводна жртва избра да не сведочи, а Џексон обезбеди спогодба од околу 20 милиони долари со семејството на момчињата. Потоа, во 2005 година, поротата во Калифорнија го ослободи Џексон од обвинение за злоупотреба и малтретирање деца и продавање алкохол на малолетници.
