– Денес времето во Македонија ќе биде променливо облачно и ЗНАЧИТЕЛНО ПОСВЕЖО со сончеви периоди. Ќе има услови и за локален краткотраен дожд, а ќе дува и слаб до умерен, а долж Повардарието повремено засилен ветер од северен и од северозападен правец, вели нашиот метео прогнозер Славчо Попоски.
Температурите ќе се искачуваат во интервалот од 22 до 30 степени.
Во Скопје и околината времето ќе биде променливо облачно со сончеви периоди и со умерен, повремено засилен ветер од северен правец. Попладне и навечер ќе има услови за слаб локален дожд. Максималната температура ќе се искачи до околу 24 степени.
Според Попоски, утре ќе се задржи променливо облачно и уште посвежо време со услови за локален краткотраен дожд, особено попладне и во вечерните часови. Ќе дува умерен, особено долж Повардарието повремено засилен ветер од северен и од северозападен правец.
–Од четврток ќе имаме целосно стабилизирање на времето, додека наутро ќе биде доста студено кога минималните температури понекаде ќе се спуштат дури до 0 степени. Максималните пак до четврток ќе се искачуваат во интервалот од 17 до 26 степени, а од петок, па за време на викендот ќе бележат тенденција на пораст и тоа поради продор на потопла воздушна маса од југ и ќе се искачуваат во интервалот од 25 до 32 степени, вели Попоски.
