Поранешниот германски канцелар Герхард Шредер (на функцијата 1998-2005) пристигна во Москва на разговори за енергетска политика. Ова го објави денес Шпигел (Der Spiegel), повикувајќи се на извори и опкружувањето на политичарот.
Според нив, централна тема на преговорите во Москва ќе биде снабдувањето со гас преку гасоводот Северен тек. Во исто време, како што пишува весникот, не е јасно со кого точно ќе се сретне поранешниот германски канцелар во руската престолнина, пренесува тасс.
Сопругата на Шредер, Јеон Ким-Шредер потврдила за весникот дека целта на неговата посета е да преговара за енергија. Во исто време, самиот екс-канцелар им кажал на новинарите во Москва дека е „на одмор“ во руската престолнина. „Тој не е на одмор, туку преговара за енергетска политика во Москва“, рекла Со-Јонг Ким-Шредер, пренесува тасс.
Последен пат поранешниот германски канцелар официјално ја посети Москва во март за да разговара со рускиот претседател Владимир Путин за ситуацијата во Украина. Прес-секретарот на рускиот лидер, Дмитриј Песков, во вторникот изјави за новинарите дека Шредер, колку што знае Кремљ, навистина е во Москва. Средби со рускиот лидер, според него, тој се уште не закажал, но не се исклучени контакти. Портпаролот на Кремљ, исто така, појасни дека сега Путин и Шредер одржуваат контакти „помалку активно“ отколку за време на неговиот мандат како германски канцелар, пренесува тасс.
Во Германија, Шредер е остро критикуван за блиските врски со Русија. Претходно, буџетската комисија на Бундестагот ја одобри апликацијата на владејачките партии со кои бараат на екс-канцеларот да му се одземат некои од привилегиите, кои согласно законот се финансираат од даночните обврзници.
Во претходно објавеното интервју за „Њујорк тајмс“, Шредер нагласи дека политичката и економската изолација на Русија е невозможна на долг рок, а просперитетот на Европската унија, вклучително и Германија, секогаш ќе зависи од снабдувањето со руски суровини. Поранешниот германски канцелар на крајот на мај ја одби кандидатурата за бордот на директори на Гаспром.
