Глумицата Кристин Дејвис се опрости на Инстаграм од својата славна колешка Френсис Стернхаген која почина вчера во својот дом во Њујорк на возраст од 93 години. Двете глумеа свекрва и снаа во култната серија „Сексот и градот“ и тоа беше една од бројните улоги која ја остави зад себе актерската ѕвезда.
„Тукушто слушнав дека славната Френсис Стернхаген почина. Живееше прекрасен, исполнет живот и беше уживање да се работи со неа. Моите мисли се со нејзиното семејство“, напиша глумицата Кристин Дејвис.
Кристин објави заедничка сцена од прочуената серија и пораката ја заврши со емотикон срце.
Френсис Стернхаген глумеше свекрва Шарлот Јорк од 2000. до 2002. година. Таа улога ѝ донесе номинација за Еми награда. Остави зад себе бројни други впечатливи улоги како онаа во прославениот филм „Driving Miss Daisy”, како и во сериите „Cheers” (со две номинации за Еми признание), „ER“, „Misery“.
Френсис Стернхаген добитничка е на две Тони награди, и двете во категорија за главна глумица(“The Heiress” и “The Good Doctor”). Повеќепати била номинарана за ова признание.
Зад себе остави бројни филмски улоги: “Misery”, “Bright Lights”, “Big City”, “Julie & Julia”, “The Hospital” и “1983’s Independence Day”. Пред десет години ѝ беше врачена Obie награда за животно дело.
Синот на актерката Џон Карлин ја потврди тажната вест на Инстаграм каде го напиша следново за неговата мајка: „Франи. Мама. Мама. Френсис Стернхаген. Во понеделникот вечерта, на 27 ноември, таа почина мирно во својот дом, месец и половина пред нејзиниот 94. роденден…Само напред Франи, се спушта завесата на животот што го живееше толку богато, страсно, скромно и великодушно“.
