Актерот Метју Пери почина на 28 октомври на 55-годишна возраст.
Неговото семејство се огласи дури сега, еден месец по неговата смрт, и откри дека планираат да му ја исполнат најголемата желба, која не успеал самиот да ја исполни во текот на животот.
Имено, познато е дека Метју долго се борел со алкохолизмот и зависноста од дрога, а за својата борба зборуваше отворено, особено во своите мемоари „Пријатели, љубовници и големата страшна работа“.
Неговата силна желба била да основа фондација и да им помогне на сите кои се соочуваат со исти или слични проблеми, а семејството на актерот на 3 ноември ја лансираше Фондацијата Метју Пери.
„Нам како семејство ни е важно да го почитуваме наследството на Метју. Потенцијалот што Фондацијата Метју Пери го има да им помогне на оние кои страдаат од вакви болести е нешто што сме горди да го донесеме на светот“, изјави семејството на Пери за „Пипл“.
На социјалната мрежа „Х“ се огласи и очувот на Метју, Кит Морисон кој ги повика сите кои можат и сакаат да донираат пари за оваа фондација.
„Ова не е нешто што обично го правам, но оваа година е поинаку. Направете што можете, тој би ви бил благодарен“, напиша Кит.
Потсетуваме, Метју Пери се прослави со улогата на Чендлер Бинг во хит серијата „Пријатели“, а често нагласуваше дека не сака оваа улога да биде единственото нешто по што ќе остане запаметен. Затоа, на почетната страница на веб-страницата на фондацијата што го носи неговото име, има и негов цитат.
„Кога ќе умрам, не сакам Пријатели да бидат првото нешто што се споменува. Сакам помагањето на другите да биде првото нешто што се споменува. И ќе го живеам остатокот од мојот живот докажувајќи го тоа. Зависноста е премногу моќна за некој сам да ја надмине. Но, заедно, ден по ден, можеме да ја победиме“, пишува на страницата.
