Актерот Енис Бешлагиќ им се обрати на своите следбеници на социјалните мрежи со видео снимено од болница, каде што извршил превентивни здравствени прегледи. Преку личен и искрен настап, тој испрати важна порака за грижата за сопственото здравје.
Бешлагиќ објасни дека се одлучил за превентивна колоноскопија и гастроскопија, со цел навреме да го провери своето здравје. Како што истакна, резултатите се добри, а прегледите ги направил од чисто превентивни причини, особено затоа што е над 50 години.
„Сè е во ред. Не е ‘Наша мала клиника’, туку специјална болница каде што направив колоноскопија и гастроскопија. Превентивно. Кога си над 50 години, ова е препорака за сите“, порача актерот.
Тој додаде дека интервенцијата ја извршил под анестезија, што значително ја олеснува целата постапка, а при прегледот биле забележани и мали проблеми кои веднаш биле отстранети.
„Ова е повик до сите да направат еден ‘сервис’ на себе. Се грижиме за автомобили, за куќи, за греење, за сè друго, а најмалку за себе“, искрено порача Бешлагиќ.
По објавата, под видеото се појавија бројни пораки за поддршка.
