Актерот Метју Пери беше погребан во саботата на гробиштата во Лос Анџелес, една недела по неговата ненадејна смрт во неговиот дом. Познатиот актер минатиот викенд беше пронајден мртов во џакузи, а причината за смртта се уште не е позната.
Пред неколку дена беа објавени токсиколошки наоди во кои се наведува дека Метју Пери не конзумирал фентанил или метамфетамин. Исто така, во неговото тело не се пронајдени траги од тие супстанции.
Тогаш извори за странски медиуми објавија дека ќе биде направен уште еден длабински тест за да се покаже дали во моментот на смртта имал други недозволени супстанци во телото. Тие резултати би можеле да потраат уште неколку месеци.
Но, поранешен здравствен истражувач од Њујорк, д-р Мајкл Баден, се огласи и изјави за Фокс њуз дека е чудно што се уште не е позната причината за смртта на популарниот актер.
– Да умреше Метју Пери од срцев удар, тоа веднаш ќе се видеше, веднаш ќе го кажеа тоа – рече тој и додаде дека сигурно „има добра причина зошто се молчи за сето ова“.
Баден истакна и дека е можно актерот, со оглед на тоа што бил пронајден во џакузито, да „умрел од топлотен удар“.
– Секако е сигурно дека починал од природна смрт, особено кога ќе се земе предвид неговата здравствена историја – заклучил докторот.
