Американскиот актер Дејвид Гејл, на нашата публика најпознат по улогата во култната серија „Беверли Хилс 90210“, почина на 58-годишна возраст.
Тажната вест ја потврдија неговиот долгогодишен пријател Питер Фериеро, како и неговата сестра Кејти Колменарес. Сепак, причината за смртта на актерот не е јавно објавена.
“Едвај да има ден во мојот живот кога не си бил покрај мене. Секогаш мој лидер, мој најдобар пријател, подготвен да се соочи со се и секого. Секогаш ќе те чувам толку цврсто во срцето секој ден”, напишала Кејти на Инстаграм.
Во серијата „Беверли Хилс 90210“, која ги одбележа 90-тите години на минатиот век, тој го толкуваше ликот на Стјуарт Карсон, кој накратко беше свршен со Бренда Волш, ликот кој го толкуваше Шенон Доерти. Шенон пак, со години се бори со тумор, а неодамна откри дека состојбата ѝ се влошила.
Гејл беше познат и по улогата на др. Џо Сканлон за време на две сезони на „Порт Чарлс“. Последен пат се појави на големите и малите екрани во 2008 година во филмот „The Belly of the Beast“.
