Иранецот Аму Хаџи, кого го нарекуваа „највалканиот човек на светот“, почина на 94-годишна возраст. Својата неславна титула ја заслужи со тоа што не се бањаше долги 60 години.
„Највалканиот човек на светот“ почина во неделата во Иран, јавија локалните медиуми.
Хаџи не се истуширал повеќе од половина од својот живот, одлука што му ја наметнал стравот дека ако го стори тоа ќе се разболе. Меѓутоа, непосредно пред неговата смрт, мештаните од неговото село наводно го принудиле да се избања.
Иранецот имал аверзија кон сапун и вода, а велел дека ја мрази и самата помисла да се капе.
Хаџи го избрал овој ексцентричен начин на живот откако во младоста доживеал „емоционални падови“, по што се дистанцирал од сите. Поголемиот дел од својот живот го поминал во селото Дејгах, во провинцијата Фарс во Иран. Загрижените мештани таму му изградиле колиба од цигли, гледајќи дека спие на отворено.
За неговиот живот во 2013 година е снимен краток документарен филм „Чудниот живот на Аму Хаџи“, но спорно е дали тој навистина го држи светскиот рекорд за најдолго време поминато без капење.
За тој рекорд се пријавија уште неколку луѓе. Познато е и кој би можел да го наследи Хаџи, а тоа е Индиецот Каилаш Синг кој во знак на протест не се бањал повеќе од 30 години.
View this post on Instagram
