Маријана Новачевска откако се врати од Македонија во Австралија: Вредни мигови со внуката Ева
Маријана Новачевска, која по летниот престој во Македонија повторно се врати во Австралија, сподели нова фотографија со својата внука Ева. На фотографијата бабата и внуката позираат прегрнати и насмеани, а Маријана токму оваа семејна фотографија ја избра и за своја профилна фотографија на Фејсбук.
Ева е ќерка на синот на Маријана, Филип и неговата сопруга Анастасиа. Маријана стана баба за првпат на Велигден во 2020 година, кога Ева се роди во Мелбурн.
Маријана повеќе од три децении живее во Австралија, а летово по тригодишна пауза дојде во Македонија и остана речиси три месеци. Престојот го одбележа и нејзиното музичко враќање со сестрата близначка Росана Сариќ-Тодоровска.
По повеќе од три децении, Маријана и Росана повторно снимија нова песна заедно. Со Драган Спасов-Дац и Александар Митевски ја снимија „Засекогаш млади“, за која беше снимен и видеоспот во Скопје и Куманово. Автор на музиката е Митевски, а во проектот учествуваа и Огнен Неделковски како текстописец и Дарко Димитров како продуцент.
„Да ми кажеше некој дека на 61 година пак ќе запеам со сестра ми и ќе се удираме со колички во лунапарк, немаше да поверувам. Живејте го животот, зашто нема реприза“, рече Маријана по снимањето на спотот.
На почетокот на септември таа се врати во Австралија, велејќи дека речиси тримесечниот престој во Македонија го поминала прекрасно, со многу дружба, шеги, насмевки и песна.
Маријана и Росана се меѓу препознатливите тандеми на македонската сцена, а нивните песни, меѓу кои и „Признавам“, станаа евергрини во македонската забавна музика. Маријана од бракот со починатиот композитор Тоде Новачевски ги има синот Филип и ќерката Магдалена.
