Пред неполна година, Панчо од „ДНК“ напиша срцепарателен статус за негов близок пријател кој почина на 1 ноември во 2024 година.
Станува збор за познатиот новинар Зоран Василевски, кој беше попознат како Зоки Фаци, кој почина по борба со ракот. Само една година потоа, и Владимир Блажев-Панчо го напушти овој свет, а овој статус открива многу за тоа каков човек беше тој.
– Денес нѐ напушти Зоки Фаци. Дојде денот кога нема да имаш повеќе болка. Жалам што си замина прерано и што Македонија дефинитивно го изгуби КРАЛОТ на таблоидното новинарсто.
Беше чиста и искрена душа, добар човек, пред сѐ. Беше едно големо дете полн со љубов и енергија. Оние кои лично не те познаваа нема да го споделат истото мислење со мене, но тоа е најмалку битно.
Твојата посветеност кон професијата знаеше да ти донесе и многу непријатели, но убеден сум дека многумина од оние со кои не си простивте пред да заминеш им е криво, но знам и дека ти веќе си им простил, во тоа беше твојата големина и разлика од останатите.
Сакале ние или не, твоето име нема кој не го знае, и старо и младо, а такво нешто треба да се заслужи со долгогодишна работа и труд.
Дефинитивно ќе фалиш како новинар, другар, пријател и пред сѐ, како човек, бидејќи сѐ помалку ги има…
Ќе те памтам по многу смеа, луди идеи и по тоа што на почетоците на нашата кариера секогаш си бил тука за „ДНК“ кога најмногу ни било потребно. Јас те викав Золе, ти мене Панчито и така беше до самиот крај.
Сега одмарај таму горе каде што повеќе нема ништо да те боли, а ние нема да те жалиме, ќе славиме ќе пееме и ќе те споменуваме со секое пеење на „Стојам Сам“ бидејќи кога излезе песната ми се јави и ми кажа дека тоа е твоја автобиогравска.
Сочувство до семејството и фамилијата. Со почит, Панчо – стои во објавата која Панчо ја напиша за Зоки Фаци пред неполна година.
